ОХУ-ын Красноярск хотноо энэ сарын 13-16- ны өдрүүдэд Г.Д.Миндиашвилигийн нэрэмжит бөхийн академиас зохиодог олон улсын тэмцээн болох гэж байна. Ес дэх жилээ зохиогдож буй тус тэмцээнд оролцохоор эрэгтэй 20, эмэгтэй долоон тамирчин хойд хөршийн зүг хөлгийн жолоо заллаа.

Ц.Баярсайхан, Б.Баяраа дасгалжуулагчтай эл багийн бүрэлдэхүүнийг танилцуулбал 55 кг-д Д.Цогтбаатар, Б.Наранбаатар, Г.Амархүү, Б.Номин, С.Батболд, 60 кг-д Э.Ням-Очир, Г.Мандахнаран, Б.Хаш-Эрдэнэ, Х.Ундрахбаяр, Т.Түвшинтулга, Б.Нэмэхбаяр, 66 кг-д Г.Идэрхүү, П.Өнөрбат, Т.Даваахуяг, 74 кг-д Б.Номиндалай, М.Мэндсайхан, 84 кг-д П.Өсөхбаатар, Д.Хүдэрбулга, 96 кг-д Я.Алтантулга, Ч.Батчулуун, эмэгтэйчүүдээс 48 кг-д Ц.Энхжаргал, Ц.Бямбазаяа, 55 кг-д Г.Хонгорзул, 63 кг-д С.Пүрэвхүү, Ц.Баярзаяа, 67 кг-д Б.Одончимэг, 72 кг-д Б.Наранчимэг нар тус тус зодоглох гэнэ. Мөн зохион байгуулагчид олон улсын шүүгч Х.Ганболдыг ирж шүгэлдэхийг урьжээ.

Үүний дараа Красноярск хотноо 27-30-нд FILA- гийн хуваарьт багтдаг олимп, дэлхийн аварга Иван Ярыгины нэрэмжит “Алтан гран-при” олон улсын тэмцээн болно. Энэ тэмцээнд дээрх 20 эрэгтэй тамирчин үргэлжлүүлэн барилдах бол эмэгтэйчүүдийн бүрэлдэхүүн зуун хувь солигдож, 48 кг-д Ч.Ганчимэг, Д.Отгонцэцэг, 55 кг-д Э.Сумъяа, С.Бямбацэрэн, 63 кг-д О.Насанбурмаа, Ш.Түмэнцэцэг, Т.Мөнхтуяа, 72 кг-д О.Бурмаа, Б.Оюунсүрэн нар хүч үзэх ажээ. Тэднийг МУГД А.Цэдэнсодном, МУГТ, МУГД З.Дүвчин, МУГД Т.Сүхбаатар нар удирдаж, Л.Болормаа, Х.Ганболд хоёр шүүгчээр ажиллах юм байна.