Шнайдер "Оскар" авсан Интерийн 3 дахь тоглогч

Диего Милито 2010 оны Италийн шилдэг хөлбөмбөгчөөр тодорлоо. Аргентин тоглогч багийн анд Уэсли Шнайдерийн өмнө орж энэ шагналыг хүртсэн бөгөөд шилдэг дасгалжуулагчаар өдгөө Реалыг удирдаж буй Жозе Моуриньо тодорчээ.

Италийн хөлбөмбөгчидийн холбооноос гардуулдаг “Oscar del Calcio”  шагналын эздийг Сери А лигийн тоглогчидын өгсөн саналаар тодруулдаг.

Милито өнгөрсөн улиралд Интерийн гайхалтай амжилтын гол цөм болж 3 чухал тэмцээнд хожлын гоол оруулсан.   Аваргуудын лиг, Италийн цом болон Сери А-гийн шийдвэрлэх тоглолтуудад тэрээр хожлын бөмбөгийг хийсэн билээ.

Лигтээ Милито нийт 22 гоол оруулж мэргэн буучдын жагсаалтанд 2-рт жагссан юм. Ийнхүү  сүүлийн 3 жил дараалан Интерийн тоглогч шилдгээр нэрлэгдлээ. 2008, 2009 онд Златан Интерт байхдаа “Оскар” авч байсан юм.

“Энэ бол мэдээж хэрэг нэр төрийн хэрэг. 2010 он миний хувьд хэзээ ч мартагдахгүй он байх болно” гэж энэ оны ялагч шагналаа гардахдаа хэлсэн юм.

Шилдэг дасгалжуулагчааар нэрлэгдсэн Моуриньо Испанид байгаа учраас шагнал гардуулах ёслолд ирж чадсангүй. Гэхдээ тэр бичлэгээр өөрийн мэндийг багийнхандаа хүргэсэн юм. “Намайг уучлаарай. Лхагва гаригт Севильятай Испаний цомын тоглолттой болохоор би очиж чадсангүй. Миний хувьд хүндлэл гэдэг маш чухал зүйл учраас Оскарын шагнал авсандаа баяртай байна. Сери А бол маш өрсөлдөөнтэй лиг” хэмээн Онцгой эрхэм хэлэв.

Шилдэг Итали хөлбөмбөгчөөр саяхан Интерийг сөхрүүлсэн Удинезегийн Антонио Ди Натале тодорсон бол гадаадын шилдэг тоглогчоор Д.Милито нэрлэгдсэн.

Аргентиний залуу од, Палермогийн хагас Хавьер Пасторе шилдэг залуу тоглогч, Интерийн Жулио Цесар мэдээж хэрэг шилдэг хаалгачаар шалгарсан. Харин хамгаалагчын хувьд Ювегийн Кьеллини, Интерийн Самуель нарын санал тэнцсэн учраас хамтдаа шилдгээр тодорсон.

Оны шилдэг гоолоор Майконы Ювегийн хаалганд хийсэн гайхалтай гоол өрсөлдөгчгүй нэрлэгдлээ.