Италийн цомын их шөвгийн 2 тоглолт өнгөрсөн шөнө явагдсан. АС Милан Сампдориаг 2 : 1-ээр ялж дараагийн шатанд үлдсэн. Пато 5 минутын зайтай 2 гоол оруулж (17′, 22) багаа ялалтад хөтөлсөн юм. Бразил довтлогч энэ улиралд 4 дэх удаагаа нэг тоглолтод дубль хийлээ.

Миланы шинэ цэргүүд Марк Ван Боммель, Эмануэльсон энэ тоглолтод гараанд гарч дебут тоглолтоо хийсэн. Эмануэльсон Патогийн 2 дахь гоолын дамжуулалтыг өгч муугүй эхлэл хийлээ. Мөн Сампдориагаас энэ өвөл Миланд ирсэн Кассано 78 дахь минутад сэлгээгээр талбайд гарч хуучин андуудтайгаа “уулзсан”. Милан Сампдориатай италийн цомд  хийсэн сүүлийн 5 тоглолтдоо бүгдэд нь ялалт байгуулж байна.

Шөвгийн наймын өөр нэгэн сонирхолтой тулаан Наполи – Интерийн хооронд өрнөсөн. Үндсэн цаг, нэмэлт цагт аль аль нь гоол оруулж чадаагүй тул торгуулийн цохилтоор ялагчыг тодруулсан. Энэ хариуцлагатай мөчид Наполигийн лидер Лавесси цохилтоо алдаж баг нь 5-4-аар ялагдал хүлээлээ. Тоглолтын турш 2 багийнхан гоол оруулах боломжтой маш олон довтолгоо зохион байгуулсан. 40 дэх минутад Камбьяссо хаалгачын эсрэг ганцаараа гарсан ч шон оносон. Үүнийхээ горыг Интер 2-р хагаст амсах дөхсөн ч Кастелаццигийн гайхалтай хаалтууд тэднийг ялагдлаас аварчээ.

Наполи уг нь талбайдаа хийсэн сүүлийн 8 тоглолтод ялагдаагүй гэсэн тун дажгүй үзүүлэлттэй байсан.

Мөн Интерийг талбайдаа хүлээж авсан сүүлийн 4 тоглолтод гоол алдаагүй байсан юм.  Гэвч Леонардогийн залуус  цувралыг нь тасалдууллаа.

Өнгөрсөн даваа гаригт Палермо – Парма багуудын тоглолт мөн торгуулийн цохилтоор шийдэгдэж  Делио Россигийн Палермо 5 – 4-өөр ялалт байгуулсан.

Өнөө шөнө шөвгийн дөрөвийн сүүлийн эрхийн төлөө Ювентус – Рома багууд Туриний Олимпико цэнгэлдэхэд тулна.  Манай цагаар шөнийн 03.45 минутаас уг тоглолт явагдана.

Сампдориа 1 : 2 АС Милан

Наполи 0 : 0  Интер  (4 – 5)