Өнөө шөнө хөлбөмбөгийн өвлийн наймааны цонх хаагдана. Түүнээс өмнө Европын багууд шинэ тоглогчоо амжиж авах гэж яарч, их хэмжээний мөнгө хаяж байгаа тухай мэдээлэл цацагдах боллоо. Энэ улирлыг амжилттай өндөрлөж, ирэх улирлаас Аваргуудын лигт өрсөлдөх бодолтой байгаа багуудын хувьд өвлийн цонх хаагдахаас өмнө шинэ, шилдэг тоглогч авах хүслээ гүйцэлдүүлж буй бололтой. Хэдийгээр албан ёсны мэдээлэл цацагдаагүй байгаа ч Торрес “Челси” рүү одож, Кэрролл түүний оронд ирж буй тухай спортын цахим хуудсууд, телевизүүдээр мэдээ тарж эхэллээ. “Ливерпуль”-д “Челси” 45 саяыг өгч, харин Торрест долоо хоногийн 200 мянган паундын цалин мөн амжилттай тоглосон тохиолдолд нэмэлт урамшуулал амласан гэнэ. Харин “Ливерпуль” Торресийг үдмэгцээ Энди Кэрроллийг авахын тулд “Ньюкасл”-д 35 саяыг санал болгосныг хүлээн авсан тухай мэдээлж эхлэв.

“Тоттенхэм” Диего Форланыг авахаар сэтгэл шулуудаж, 17 саяыг “Атлетико”-д төлөхөд бэлэн байгаа гэнэ. Харин Аргентиний довтлогч Агуэро багтайгаа шинэ гэрээ хийжээ.

“Ливерпуль”-ийн шинэ цэрэг Суарес 7 дугаарыг сонгосон тухай мөн мэдээлж байна. Өвлийн цонх хаагдахаас өмнө өөр олон сонирхолтой наймаа хийгдэж болзошгүй байна.