Эмануэльсон баатар болох боломжоо алдав

Сери А-г тэргүүлэгч АС Милан ардаасаа нэхэж яваа Лациог талбайдаа хүлээж авсан ч гоол оруулж чадалгүй 0 : 0-ээр тэнцлээ. Ийнхүү АС Милан 2 оноо алдаж Наполид боломж олголоо. Өнөө шөнө Наполи Кьвотэй хийх тоглолтод ялж чадвал АС Милантай онооны зөрүү хоёр болж ойртох юм. Россонерричүүд өнгөрсөн шөнө эсрэг багийнхаа хамгаалалтыг тун завгүй байлгаж нийт 20   удаа цохилт хийсэн ч ердөө 2  нь л хаалга руу чиглэсэн юм.

Златан Ибрагимович ялангуяа тун азгүй байж хоёр ч удаа хаалганы шон оноод амжсан. Мөн Урби Эмануэльсон  гоол оруулах тун сайхан боломжыг алдаж багаа хөөдсөн юм.

Өвлийн цонх хаагдахаас өмнө Ювегээс үнэгүй ирсэн ахмад хамгаалагч Никола Легротталье 46 дахь минутад Даниэле Бонерагаар сэлгэгдэн талбайд гарч ирсэн ч цаг дуусахаас 6 минутын өмнө бэртэл авч Папастатопулосоор сэлгэгдэн эргэн талбайгаас гарсан юм.  Өмнөх тоглолтуудад багтаа чамгүй тус болсон Антонио Кассано 63 дахь минутад Патогийн оронд сэлгээгээр орж ирсэн ч түүний дамжуулалтуудыг Робиньо, Ибра нар гоол болгож чадсангүй.

Улирлын эхэнд энэ хоёр баг оноолт тааран тоглоход мөн л эвийн гэрээгээр дуусаж байсан юм.  Өнөө шөнө Сери А лигийн 23-р тойргийн бусад тоглолтууд явагдах юм.