Арсенал премьер лигийн аваргын төлөө өрсөлдөх хангалттай хүчтэй гэдгээ Эвертонтой хийсэн маргаантай тоглолтод харууллаа. 24 дэх минутад Луи Саагийн отон тоглолтоос оруулсан гоолыг шүүгч тооцсон. Гэхдээ шударга үнэн ялж хоёрдугараа хагаст сэлгээгээр орж ирсэн Аршавин, Лоран Косельни нар гоолдож 2 : 1-ээр ялалт байгуулсан юм. Буучид ийнхүү МанЮ-гийн араас хоцролгүй нэхсээр байна. Одоогоор хоёр багийг 6 оноо тусгаарлаж байгаа юм.

Өнгөрсөн долоо хоногт ФА цомд Хаддерсфилдийн эсрэг гаргасан бүрэлдэхүүнээ Венгер тэр чигээр нь өөрчилж хамгийн  боломжит хүчтэй  бүрэлдэхүүний Ливерпулийн эсрэг гаргасан байлаа.  Хэрэгцээгүй олон тэнцээнээсээ болж хүснэгтийн 13-р байр хавиар яваа Эвертонд ч европын эрх авахын тулд 3 оноо зайлшгүй хэрэгтэй тул  Дэвид Мойес шилдгүүдээ талбайд илгээсэн байв. Түүний  Билялетдиновоор Саагийн довтолгоог дэмжүүлэх гэсэн төлөвлөгөө амжилтанд хүрч эхний үед Эвертончууд илүүрхэж байлаа.

Тоглолт дөнгөж эхлээд 5 минут өнгөрч байхад Жек Уилшир шар хуудсаар торгуулж тоглолтын үлдсэн минутыг сэтгэлийн дарамтан дор өнгөрүүлэх болов.  Эхний үеийн дундаас Арсеналын тоглолт орж эхэлсэн ч гоол оруулахад хэрэгтэй сүүлийн дамжуулалт дутагдаж байлаа. 24 дэх минут хүрэл Фабрегас, Валкотт нар өрсөлдөгчийнхөө алдаан дээр ажиллах гэж хэд хэд оролдоод үзэв.

Харин 24 дэх минут үргэлжилж байхад Симус Коулмен бүтэн биеэрээ  отон тоглолтод байсан Луи Саад дамжуулалт өгтөл хажуугийн шүүгч тугаа өргөсөнгүй. Довтолгоо цааш үргэлжилж Саа  Щесныгын хаалганд эхний гоолыг оруулсан. Арсеналын тоглогчид хичнээн маргалдаад нэгэнт шийдвэрээ гаргасандаа “бантсан” шүүгчидын бодлыг өөрчилж чадсангүй. Энгийн нүдээр ч харж болохоор байсан отон тоглолтоос орсон гоол премьер лигийн шүүгчидын асуудлыг дахин хөндөхөд хүргэлээ. Ливерпуль – Волвесийн тоглолтыг хажуугаас дэнсэлсэн эмэгтэй шүүгч Шон Массейгийн маргаан мартагдаагүй байтал дахиад нэг асуудал гараад ирлээ.

Шударга бус шүүлтийн хохирогч болсон Буучид хариуг нь барихаар тэмцэж эхэллээ. Фабрегас, ван Перси олдсон боломжуудаа үүний дараа алдаж тэртээ тэргүй буримдалтай байсан фенүүдээ дахин гомдоов.

Хоёрдугаар үеийн эхэнд бэртэл авсан Сонгийн оронд Абу Диаби талбайд гарч ирлээ. Талбайд гарч ирээд Диаби хаалга руу чиглэсэн нэг эвгүй мөргөлт хийгээд амжлаа. Эхний хагаст тун завгүй байсан шүүгчийн ажил хоёрдугаар үеийн эхнээс дахин ундарч эхэллээ. Ердөө 5 минутын зайтай Ли Мэйсон хоёр багийнханд тус бүрт нь хоёр шар хуудас хүртээгээд амжив.

62 дахь минутад тоглолт нь төдийлөн орохгүй байсан Росицкиг сэлгэж Андрей Аршавин талбайд орж ирэв. Түүнтэй зөрөөд нутаг нэгт Билялетдинов нь сэлгээд сууж Леон Осман сэлгээгээр орж ирэв.

Арсеналчуудын хичээл зүтгэл 70 дахь минутад үр дүнд хүрлээ. Фабрегасын өлгөж өгсөн дамжуулалт Родуэллийн толгойгоор дамжин Аршавинд ирэв. Орос залуу ч бөмбөгийг газар унагалгүй шууд цохиж тэнцээний бөмбөгийг хийсэн. Арсенал дахь карьер нь бага зэргийн удаашралд ороод байгаа ч Шава энэ улирал 5 гоолтой боллоо.

Леон Осман 74 дэх минутал Валкоттын довтолгоог зогсоох гэж байгаад шүүгчээс сануулга хүртсэн 7 дахь тоглогч болов.

Үүнээс нэг их удалгүй ван Персигийн тун нарийн цохисон чөлөөт цохилтыг Тим Ховард гараараа дөнгөж л   хатгаж дөнгөлөө. Гэхдээ энэ өдөр түүний хаалганд заавал нэг гоол орох ёстой байжээ.

75 дахь минутад булангийн цохилтоос ирсэн бөмбөгийг Лоран Косельни мөргөн багтаа ялалтын гоолыг авчирсан.  Овен Койл Виктор Аничебе, Фил Ягиелкагаас довтолгоогоо нэмсэн ч Буучид үлдсэн минутад алдаа гаргасангүй.

Арсенал 15 дахь хожлоо авч 49 оноотой боллоо.

2 сарын 1. Лондон. Стадион “Эмирейтс”. Шүүгч – Ли Мэйсон (Бостон).
АРСЕНАЛ – ЭВЕРТОН – 2:1 (0:1)
Саа, 24 (0:1). Аршавин, 70 (1:1). Косельни, 75 (2:1).
Арсенал	Эвертон
Войцех Щесны	Тим Ховард
Бакари Санья	Фил Невилл, 79
Йохан Журу	Жон Хейтинга
Лоран Косельни	Сильвен Дистен
Гаэль Клиши	Лейтон Бэйнс
Александр Сонг, 46	Симус Коулмен, 78
Жек Уилшир, 69	Жек Родуэлл
Тео Уолкотт	Маруан Феллаини
Сеск Фабрегас	Микель Артета
Томаш Росицки, 62	Динияр Билялетдинов, 65
Робин Ван Перси	Луи Саа
Сэлгээ :
Абу Диаби, 46	Леон Осман, 65
Андрей Аршавин, 62	Виктор Аничебе, 78
Никлас Бендтнер, 69	Фил Джагиелка, 79
Шар хуудас :
Жек Уилшир, 5	Сильвен Дистен, 14
Томаш Росицки, 45	Жек Родуэлл, 46
Робин Ван Перси, 60	Микель Артета, 59
	Леон Осман, 74