Английн “Вест Хэм Юнайтед” багийн удирдлага Өмнөд Африкийн довтлогч Бенни Маккартиг 200 мянган паундаар торголоо. Бенни бэлтгэл тасалж, хэл ам хийгээгүй хэрнээ торгуулсаны учир нь илүүдэл жин. Долоо хоногтоо 38 мянган паундын цалинтай Бенниг ийнхүү сар хагасын цалингаар торгосон нь “Вест Хэм” түүнийг илүүдэл жинтэйгээ тэмцэхийг хатуу сануулсан хэрэг гэнэ.

Илүүдэл жингийн энэхүү драм 2009 онд эхэлжээ. Тэр үед “Блэкберн”-д Бенни алба хашдаг байсан тул дасгалжуулагч Сэм Эллардайс цодойсон гэдсийг нь үргэлж илүү үзээд амраадаггүй байж. Байнга л тураах дасгал, гэдэсний таталт хийлгэж түүнийг үргэлж зовоох болжээ. Азаар тэр үед “Вест Хэм” илүүдэл жинтэй эрийг сонирхож, 2.5 сая паундаар худалдан авсан юм.

2010 оны тавдугаар сард түүний бөөрөнхий биеийн 24.2 хувийг өөх бүрхсэн байгааг мэргэжилтнүүд тогтоосон аж. Энэ нь тамирчин хүнд байх ёстой хэмжээнээс хоёр дахин давсан хэрэг.

Илүүдэл жингээсээ болоод Бенни ӨАБНУ-ын шигшээ багтаа ч тоогдсонгүй. Харин одоо “Вест Хэм” бөөрөнхий галбиртай тоглогчоо турааж авах хамгийн сайн арга бол авдаг “хэдэн бор юм”- тай нь тооцох явдал гэж үзжээ.

Хоёрдугаар сарын эхэнд Премьер лигт тоглох 25 хөлбөмбөгчийн жагсаалтад багтахын тулд Бенни жингээ хурдан хугацаанд гээх хэрэгтэй болсон. Гэвч бүтэлтэй юм болсонгүй.

Америкийн лигээс түүнд хоёр санал ирээд байгаа нь “Вест Хэм” болон Беннигийн сонирхол зэрэг татаж байгаа гэнэ.