“Манчестер Юнайтед”-ын үндсэн хаалгач Эдвин Ван дер Сар энэ жил 40 насны босго давж спортын хувьд хэт ахмад настай болсны зэрэгцээ хүнд өвчтэй эхнэрээ асрах зайлшгүй шаардлагатай байгаа тул зодог тайлахаар хатуу шийдсэн. Сэр Алекс Фергюсон түүнийг багийнхаа хаалгачдын дасгалжуулагчаар үлдэхийг ятгасан ч татгалзсан хариулт авсан юм. “Би түүнийг хөлбөмбөгөөс нэг хэсэг холдмоор байгааг нь ойлгож байна” гэж Сэр Алекс ярьсан бол Ван дер Сар “Би нэг л зүйл харамсдаг. “Манчестер Юнайтед”-д хэтэрхий хожим ирсэн юм” хэмээн ярьсан удаатай. Сэр Алекс Ван дер Сарыг “Фулхэм”-ээс багахан мөнгөөр авсан нь нүдээ олсон наймаа болсон билээ. Хэзээ ч сандарч мэгддэггүй, багийнхаа хамгийн тайван, оюунлаг нь гэгддэг хаалгачийг зодог тайлсаны дараа “Улаан чөтгөрүүд”-ийн нэг дугаарыг хэн эзэмших нь тун сонирхол татаж эхлэв. Одоогоор энэ “ажлын байр”-ын төлөө Голландын “Аякс”-ын Мартин Стекеленбург, Испанийн “Атлетико”-гийн Де Хеа, Германы Шальке-04“-ийн Мануэль Нойер, “Ливерпуль”-ийн Пепе Рейна, Оросын ЦСКА-гийн Игорь Акинфеев, Францын “Лион”-ы Уго Льорис нарын нэр дурдагдаж байна. “Ажлын байр” ганц байтал нэр дэвшигчдийн тоо тавд хүрээд байгаа нь энэ.

Хамгийн сүүлд Пепе Рейна “Би спортын томоохон амжилтад хүрмээр байна. “Манчестер Юнайтед” бол үнэхээр амжилттай баг” гэж мэдэгдсэн нь “Ливерпуль”-ийн хаалгачид чамгүй мөнгө хаявал санаа нь Манчестерийн баг руу эргэж магадгүй гэсэн сэтгэгдлийг төрүүлж байна.

Мөн үүнтэй зэрэгцэн Уго Льорис “Би зун багаа сольж болох юм. “Манчестер Юнайтед” бол агуу баг. Гэхдээ юу болохыг харж л байя” хэмээн ярьжээ. Оросууд шигшээ багийнхаа хаалгач Игорь Акинфеевийг “Улаан чөтгөрүүд”сонирхож байгаа мэтээр их бичдэг. Гэвч одоогоор албан ёсоор яригдсан зүйл нэг ч үгүй. Акинфеевийг хэт хөөрөгдсөн үнэтэй гэж Сэр Алекс үнэлсэн сураг бий. Харин Голландын шигшээгийн хаалгач Мартин Стекеленбург, Германы шигшээгийн хаалгач Мануэль Нойер, Испанийн шигшээгийн ирээдүйн нэг дугаар гэж буй Де Хеа нарыг сонирхож буй тухай мэдээлэл он дамжин гарсаар байгаа билээ.

“Манчестер Юнайтед”-д бас саяхан Даниас авсан Андерс Линдегаард хэмээх залуу хаалгач бий. Гэхдээ түүнийг зөвхөн нөөц хаалгачаар ажиллуулахаар авсан гэж ярих болжээ. Харин багийн хоёрдугаар хаалгач Польшийн Томаш Кушчак ирэх зун багаа орхих бодолтой байгаа гэнэ.

Ийнхүү нэг дугаартай “Улаан чөтгөр”-ийг хайх ажил өдөр ирэх тусам улам өргөжиж, шийд гаргах хугацаа нь улам богиноссоор байна.