Туулай жилийн эхний өдрүүдэд Буриадын Ерөнхийлөгчийн нэрэмжит тэмцээнд амжилттай оролцсон чөлөөт бөхийн тамирчид өнөө өглөө Анатолийн хойг, Персийн буланг зорилоо. Энэ сарын 11-13-нд Туркийн Истанбулд нэрт бөх Ясар Догугийн нэрэмжит “Алтан гран-при”, 14-27-нд Ираны Тегеранд “Тахтын цом”-ын тэмцээн болно. Шигшээ багийн ахлах дасгалжуулагч А.Цэдэнсодном, дасгалжуулагч Ц.Баярсайхан нарын удирдлага дор эрэгтэйчүүдийн 55 кг-ын жинд Т.Даваахуяг, Г.Амархүү, Д.Цогтбаатар, 60 кг-д Б.Нэмэхбаяр, Г.Мандахнаран, П.Өнөрбат, Б.Анхбаяр, 74 кг-д М.Мэндсайхан нар зодоглох юм. Түүнчлэн Олон улсын шүүгч Х.Ганболд тэмцээнийг дэнслэхээр болжээ.