Данийн шигшээ англичуудад нөхөрсөг тоглолтод хожигдсоны дараа Даниель Аггер өмсгөлөө тайлж, нуруугаа ил гаргажээ. Гэрэл зурагчид тэр даруй түүний нуруун дээрх битүү шивээсийн зургийг авч, харин сэтгүүлчид түүн дээрх бичээсийн учрыг тайлан мэдээлж эхлэв.

Ингээд Даниель Аггерын нуруун дээгүүр жаахан “аялцгаая”.

Нурууны доод хэсэгт гурван викингийн дуулга дээр юу ч харахгүй,  юу ч сонсохгүй,  юу ч ярихгүй хэмээн бичжээ.

Харин нурууны чанх голд суугаа викинг бол Данийн домгийн баатар Ожье Арденнский гэнэ. Домогт өгүүлдгээр улс оронд нь аюул заналхийлбэл энэ викинг босч ирэн эх орноо хамгаалах юм байна. Тэр гартаа Кортаны домогт сэлэмийг атгажээ.

Ожьегийн эргэн тойронд Данийн домогт дөрвөн хааны шарил байна. Эдгээр нь Харальд Блатан, Свен Твескааг, Горм Ден Гамл, Кнуд Ден Стор хэмээх хаад аж.

Нурууны дээд талд том үсгээр “Mors Certa, Hora Incerta” гэсэн нь “Хамгийн тодорхой зүйл бол үхэл, харин хамгийн тодорхой бус нь үхэл ирэх цаг” гэсэн утгыг илэрхийлж буй юм. Зүүн тохойн дээр “Өвчин-цаг зуурынх, ялалт- үүрдийнх” гэж тунхагласан бол баруун мөрөн дээрээ бас нэгэн викинг урлаж “Хэзээ нэгэн цагт үхнэ гэдгээ санаж яв”, “Хүн гэдгээ санаж яв” гэсэн үгс шивүүлжээ. Мөн зүүн мөрөн дээрээ Данийн төрийн далбааг томоор урлуулсан байна. Энэ мэтээр түүний бие дээрх зураг, зураас бүр ямар нэгэн утгыг илэрхийлж байгаа юм.

“Ливерпуль”-ийн тав дугаартай “улаан” өмсгөлийн дотор ийм л урлаг нуугдаж явдаг ажээ.