Ирэх сарын 15-нд Филиппиний шигшээ баг манай оронд зочилж Чэллэнж кап-н хариу тоглолтоо хийнэ. Азийн хөлбөмбөгийн холбооноос зочлон тоглож байгаа багт замын зардалд тодорхой хэмжээний мөнгөн тусламж үзүүлдэг бөгөөд энэ удаа Филиппинчүүдэд 20,000 ам.доллар буюу 860,000 Филиппин песогоор туслах болсон аж.

Харин Филиппиний хөлбөмбөгийн холбооны захирал Мариано энэ мөнгөөр 30 хүний бүрэлдэхүүнтэй баг нь Улаанбаатар луу зорчиход хангалттай хүрнэ гэж үзэхгүй байна. Тэрээр ирж буцах онгоцны билет $1,500 (P64,500) болох учраас бүх багийн тамирчидыг Монгол руу зорчиход нийт $45,000 (ойролцоогоор P1.9 сая) хэрэгтэй гэж үзэж байгаа юм байна. Гэхдээ мэдээж үүнд Монголд байх хугацаанд байрлах зочид буудлын төлбөр багтаагүй байгаа. Тэд зөвхөн ирж очих замын зардлаа гаргах ёстой бөгөөд харин Монголд байх хугацаанд зочид буудал, хоол унд, бэлтгэл сургуулилтын асуудлыг манай тал зохицуулах ёстой.
Азийн хөлбөмбөгийн холбооны дүрмээр зочлон тоглох баг  3 хоногийн өмнө тухай оронд очиж бэлтгэл сургуулилт хийх боломжтой боловч Филиппинчүүд 7 хоногийн өмнө Монголд ирэхээр төлөвлөж байгаа. Үүнийгээ тэд Монголын хүйтэн цаг агаарт дасан зохицох цаг хугацаа хэрэгтэй гэж тайлбарлаж байна. Тэдний авсан мэдээллээр бол одоо Монголд шөнөдөө -20 хэм, өдөртөө -10 хэмийн температуртай байх учраас халуун орноос ийм хүйтэн газар очоод тамирчид нь сайн тоглож чадахгүй байж магадгүй санаа зовж байгаа гэнэ. “Энэ тал бид Филиппиний спортын хороо болон соёл боловсролын нийгэмлэгээс туслалцаа авахаар ярилцаж байгаа.
Филиппинд явагдсан эхний тоглолтын зардлыг бүрдүүлэхэд эдгээр байгууллага болон тус улсын ерөнхийлөгч Бенигно Акино нар 6 сая Филиппин песогоор дэмжсэн тул энэ удаа ч шигшээ багтаа тусална гэж Мариано найдаж байгаа юм байна.
Азкалууд тоглолтын бэлтгэлдээ 2 сарын 20-ноос гарах бөгөөд Багуйо хотод байрлах юм. Филиппиний хөлбөмбөгийн холбоо манайд хүсэл илгээж тоглолт явагдахаас долоо хоногийн өмнө хиймэл зүлэгтэй талбайд бэлтгэл хийх зөвшөөрөл хүссэн. Хэрвээ манай тал зөвшөөрөхгүй бол тэд Японы Фукушима хотод бэлтгэл хийхээр төлөвлөөд байгаа гэнэ.