Ла лигийн хүснэгтэд хойгуур яваа Леванте Реалын замд саад болж дөнгөсөнгүй. Өнгөрсөн шөнө явагдсан 24-р тойргийн тулаанд Эзэн хааны баг тэднийг 2 : 0-ээр буулган авч Барсатай оноогоо хэсэг хугацаанд ч гэсэн ойртууллаа. Ирэх долоо хоногт аваргуудын лигийн чухал тоглолттой ч гэсэн Моу бүрэлдэхүүнээ өөрчлөлгүй шилдгүүдээ гаргасан байв. 6 дахь минутад Ди Мариягийн гайхалтай гоцлон тоглолтыг Бензема гүйцээж тооны харьцааг нээсэн. Улмаар 41 дэх минутад Карвалью улирлын 2 дахь гоолоо оруулж багийнхаа ялалтыг баталгаажуулсан.

Реал ийнхүү энэ улирал эхлээд бүх тэмцээнд талбай дээрээ 22 дараалан  ялаад байна. Мөн Жозе Моуриньогийн хувийн амжилт энэ тоглолтоор дээшиллээ. Португал дасгалжуулагч 2002 оны 2 сарын 23-нд хамгийн сүүлд Португ дасгалжуулж байхдаа талбайдаа ялагдсан. Түүнээс хойш 9 жил өнгөрсөн ч Моугаар удирдуулсан Челси, Интер, Реалын аль нь ч талбайдаа ялагдахын зовлонг амссангүй. Гайхалтай.

Хүснэгтэд 3-р байранд яваа Валенсия Спортингтой тэнцэж Барса-Реалд улам тасрах боломж олголоо. Хэдийгээр тэд 72 хувьтай бөмбөг эзэмшиж 12 цохилтынхоо 2-г хаалга руу чиглүүлсэн ч гоол оруулж чадсангүй. Харин өнгөрсөн тойрогт Барсагаас 1 оноо зулгааж дөнгөсөн Спортингчууд 7 удаа цохисон ч хаалга руу чиглүүлж чадаагүй байна.

Сүүлийн 4 тойрогт дараалан ялагдаад байсан Атлетико энэ хар цувралаа арай гэж зогсоолоо. Реал Сарагосаг Мадридийн баг 1 : 0-ээр ялсан. Цорын ганц гоолыг Серхио Агуеро хийжээ.

Хэрвээ энэ тоглолтод оноо алдсан бол Кике Санчес Флоресийн байр суурь тун хүчтэй ганхах байлаа. Энэ үр дүн тэднийг хүснэгтийн 7-р байр луу урагшлууллаа. Өнөөдөр Ла лигийн 24-р тойргийн үлдсэн тоглолтууд явагдана.

Тоглолтуудын явагдах цагийг  манай сайтын  “Уралдаан тэмцээнүүдийн хуваарь” булангаас үзнэ үү.