Өчигдөр шөнө Английн цомын тавдугаар шатанд “Манчестер Юнайтед” эрэмбээрээ тав дахь лигт тоглодог “Кроули Таун”-ыг хүлээн авч тоглолоо. Хоёулаа “Улаан чөтгөр”-ийг бэлгэ тэмдгээ болгосон багуудын тоглолт тэнцүүхэн болж өнгөрөв. Хэдийгээр Сэр Алекс Фергюсон нөөц багийнхнаа талбайд гаргасан ч хагас мэргэжлийн багийнхантай эн тэнцүү тоглосны зэрэгцээ, тоглолтын төгсгөл рүү бүр тэнцэх дөхсөн. Премьер лигийн магнайд яваа баг дээрээсээ тав дахь лигт хоёрдугаар байрт яваа багтай сугалаа таарахад мэргэжилтнүүд мушилзаж, “Английн цомын “романтизм” гэж энэ дээ” хэмээн мэдэгдэж байсан ч өчигдрийн тоглолт ширүүн болсон. “Кроули Таун”-ы залуус “Олд Траффорд”-д алдартай өрсөлдөгчөөсөө өчүүхэн ч дутсангүй. Хангалттай довтолж, сайн хамгаалж чадаж байлаа. Тоглолтын дараа Сэр Алекс Фергюсон “Тэд тэнцсэн бол шударга дүн болох байлаа. Манай багийн зарим тоглогчид хүссэн хэмжээнд тоглосонгүй. Эхний үед бид гайгүй тоглосон. Харин хоёрдугаар үед муу тоглолоо. Бөмбөгний төлөөх тэмцэл бүр дээр ялагдаж байсан. Энэ нь миний сэтгэлийг гонсойлгож байна. Магадгүй, манай багийн зарим хөлбөмбөгчид Английн цомын тэмцээн гэж юу болохыг ойлгохгүй байх шиг. Тэдний хувьд энэ тоглолт маш том сургамж болох ёстой” гэжээ.

“Улаан чөтгөрүүд”-ийн дербигийн 28 дахь минутад Браун мөргөж гоол хийсэн нь талбайн эздэд ялалт авчирсан юм.

Хэрвээ хоёр баг тэнцсэн бол “Кроули Таун”-ы таван мянга хүрэхгүй үзэгчийн суудалтай стадионд нэмэлт тоглолт хийх байлаа.

Английн цомын тавдугаар шатанд “Сток Сити”, “Бирмингем” багууд өрсөлдөгчөө талбай дээрээ тус бүр 3:0-ээр буулган авсанаар дараагийн шатанд үлдлээ. Өнөө орой цомын дөрөвдүгээр шатны нэмэлт тоглолтод “Манчестер Сити”-“Ноттс Каунти”-тай тоглоно. Мөн тавдугаар шатны “Фулхэм”-“Болтон”, “Лейтон Ориент”– “Арсенал”-ын тоглолт болно.