NBA-гийн солилцоо наймааны цонх хаагдахад гуравхан хоног үлдээд байна. Энэ хооронд хийгдэж болох цөөнгүй наймааны сураг гарч байгаа ч тэдгээрийн хүчийг нэг л трансфер бууруулж байна. Бууруулах гэдэг ч багадна. Бүр бут цохиж байна гэж тодорхойлвол зохимжтой. 2003 оны “аймшигтай” драфтын #3-аар нэрлэгдсэн Кармело Энтони (#1 Жеймс, #2 Миличич, #4 Бош, #5 Уэйд) найм дахь жилдээ хүчин зүтгэж буй “Денвер” багийнхаа тавьсан гурван жилд 65 сая долларын хөлс авах гэрээнээс татгалзаж, өөр клуб руу явах хүсэлтэй байгаагаа мэдэгдсэн. Тэгэхдээ “Зөвхөн Нью Йорк хотод очно” гэсэн болзол тавин бусад багийн урмыг хугалсан билээ.

Ингээд мөнгөний зоорь, хөрөнгийн уурхай “Никс” түүнийг уургалах аяндаа гарсан. Гэвч тэр эрч нь сүүлийн үед эрс суларлаа. Үүнд лидер тоглогч Амаре Стадмайерийн шантаажийн нөлөө байгаа гэлцэх. Стадмайерийн далд санаагаар бол зэрэглэл, чадвар, амбиц, нэр нөлөөгөөрөө өөртэй нь өрсөлдөх хүн түүнд хэрэггүй аж. Гэхдээ энэ бол Хойд Америкийн мэргэжилтнүүдийн дэвшүүлж буй таамаг. Бодит байдал дээр Амаре өөр зүйл ярьж байгаа. Тодруулж хэлбэл багийнхаа ирээдүйн төлөө санаа зовнисон мэдэгдлийг хийж буй. Тодруулж хэлбэл багийнхаа ирээдүйн төлөө санаа зовнисон мэдэгдлийг хийж буй. Тухайлбайл “Нэг тоглогчийн төлөө багийнхаа гол ачааг үүрч яваа тоглогчидыг золионд гаргах нь буруу”.

Хэрэв Мелогийн наймаа хийгдэх юм бол “Никс”-ийн ирээдүй үнэхээр бүрхэг болох юм. Тус багийн тавьсан шинэчилсэн саналаар бол Данило Галлинари, Уилсон Чандлер, 11 саяын гэрээ нь шувтарч буй Эдди Карриг драфтын нэгдүгээр раундын нэг сонголтыг Кармело Энтони болон Чонси Билапсын оронд өгнө. Гэтэл “Наггетс” багийн эзэд үүнийг бага, бүр дэндүү бага гэж чамлаж байна. Тэдний илгээсэн хариунаас харахад “Никс” дээрх санал дээрээ NBA-д хурдан идээшиж буй Тимофей Мозгов, шилдэг шинэ тоглогчийн шагналд өрсөлдөх боломжтой Лэндри Филдс драфтын нэгдүгээр раундаас сонголт хийх дахин нэг эрхийг нэмэх шаардлагатай болжээ. Шаардлага үүгээр дуусаагүй. Өнөөгийн амжилтын нь гол ноён нуруу болж яваа холбон тоглогч Рэймонд Фелтоныг авахыг хүссэн байна.

“Денвер”-ийн шаардсан хүн бүрийг, драфтын эрх болгоныг нь өгөөд Мелог хэд гурван тоглогчийн хамт авдаг юмаа гэхэд “Никс” ирэх улиралд л гэхэд элгээрээ газар хэвтэнэ. Дээрийн ойрын жилүүдэд сэхэхээргүй болно. Бодоод үз л дээ. Дээр нэр дурьдагдсан тоглогчид бүгд тус багийн ирээдүйг авч явах залуус. Тэднийгээ драфтын шилдэг сонголтыг хийх эрхийн хамтаар өгчихөөр “Никс”-ийн ирээдүй ёлтойх ч гэрэлгүй болох нь. Багийн удирдлага “Денвер”-ийн тавьсан шаардлагыг авч хэлэлцээд өөрсдийн тавьсан сүүлийн санал дээрээ Фелтоны нэрийг орууллаа. /Эндээс харахад жилийн дараа чөлөөт агент болох өндөр магадлалтай Крис Пол, Дерон Уильямын аль нэгээр түүнийг нөхөх тооцоог тэд гаргасан бололтой/

Гэвч нааштай хариу авах магадлал тун бага юм. Тэглээ гээд тэд хохирохгүй. Яагаад гэвэл ирэх зун гэрээ нь дуусах цагт Кармелог  өөрийн болгож л таараа. Бүр сохор зоосны гарлагагүй, нэг ч тоглогчийн алдагдалгүйгээр. Гагцхүү “Никс” түүнийг өнөөдөр урвуулах гээд байгаа эхний шалтгаан нь энэ жилийн плей-оффт өндөр амжилт олох гэсэн хүсэл юм. Тэгэхгүй бол тус багийн боловсруулсан эхлээд “Майами”, “Бостон”-г зогсоож, дараа нь “Лэйкерс”, “Сан-Антонио”-г ниргэх агуу төлөвлөгөөгөө аль болох хурдан хэрэгжүүлэх гэсэн хүсэл юм. Цаг алдахгүй гэж байгаа хэрэг л дээ. Хоёр дахь шалтгаан бол Мелог гол өрсөлдөгч, ирээдүйн дерби “Нью Жерси”-д (“Нетс” удахгүй Нью-Йорк хотын харьяат баг болно) алдахгүй гэсэн тэмүүлэл.

Уг нь “Нетс” баг солилцооны цонх эхлүүт л Мело болон Билапсыг авахаар хөөцөлдсөн. Гэвч ажил нь Кармело дээр очоод гацаад байв. Түүний нэгдүгээр зэргийн сонирхол “Никс”-т очих явдал тул “Нью-Жерси”-д үнэрхэн, дааж давшгүй  болзол тавиад байв. Үүнд хилэгнэсэн багийн эзэн Михаил Прохоров хэлэлцээрийг зогсоох, бүр эцэслэн болих үүргийг доод тушаалтнууддаа өгснөө сүр дуулиантайгаар мэдэгдсэн.

Үүнээс үндэслэн спорт сонирхогчид Энтони “Никс”-т очно, үгүй бол ирэх зун чөлөөт агент болно хэмээн таамагдаж байтал солилцооны цонх хаагдах дөхсөн энэ өдрүүдэд “Нью-Жерси” амь орж, “Денвер”-тэй дахин харилцаж эхэллээ. Орос тэрбумтан Прохоров “Татгалзахааргүй санал тавь” гэж тушаасан тул түүний цэргүүд Деррик Фэйворс, Дэвин Харрис, Трой Мёрфи, Бен Узо, драфтын нэгдүгээр раундаас сонголт хийх дөрвөн эрхээ өгч оронд нь Энтоны, Биллапс, Реналдо Болкмен, Шелдон Уильямсыг авах хувилбарыг дэвшүүллээ. Энэ нь “Никс”-ийнхээс хамаагүй дээр хувилбар тул хүлээн авагч тал сэтгэл хангалуун байгаа гэнэ. Үүнийгээ ч “Наггетс” мэдэгдсэн. Гэвч Кармело зөвшөөрөх эсэх нь тодорхойгүй. Хойд Америкийн сэтгүүлчдийн мэдээлж байгаагаар тэрбээр Бүх оддын тоглолтын үеэр “Никс”-н ерөнхийлөгч Донны Уолш болон “Нетс”-ийн эзэн Прохоровтой нууц уулзалт хийхээр төлөвлөсөн сурагтай.Тэдний өгөх амлалтыг сонсож байж л эцсийн шийдвэрээ гаргах биз ээ.

Ж.Баяржаргал