Германы Дюссельдорф хотод жүдо бөхийн Гран-при тэмцээн явагдаж өндөрлөлөө. Энэ тэмцээнд манай орноос эрэгтэй 7, эмэгтэй 6 тамирчинтай баг оролцсон. Тэмцээний эхний өдөр хөнгөн жингийн барилдаанууд явагдаж манай бөхчүүд медалийн буухиагаа үргэлжлүүллээ. Эрэгтэйчүүдийн 60 кг-н жинд хүч үзсэн Г.Болдбаатар, эмэгтэйчүүдийн 63 кг-д барилдсан  Ц.Мөнхзаяа нар тус тус хүрэл медаль зүүсэн юм.

Харин 2 дахь өдөр хүнд жингийн барилдаанууд явагдлаа. Эмэгтэйчүүдийн -78 кг-д өрсөлдсөн ОУХМ П.Лхамдэгд урамтай сайхан барилдаж аваргын алтан медалиар энэ өдөр энгэрээ мялаасан.  Манай бөх эхний тойрогтоо хийлж, улмаар Унгар, Японы бөхчүүдийг ялж, хүрэл медалийн болзол хангасан бол хэсгийн аваргын төлөөх барилдаанд олимпийн аварга, Хятадын тамирчин Ян Сьюлиг юүко үнэлгээгээр ялсан. Харин  алтын төлөөх барилдаанд Германы шилдгүүдийн нэг Хейд Уоллертыг   нутаг дээр нь цэвэр ялж  Дюссельдорфын татамид аюарга боллоо.

Германы Дюссельдорф хотын захирагч Дирк Элберсийн ивээл дор хоёр дахь жилдээ зохион байгуулсан Гран-при тэмцээнд 64 орны 550 орчим жүдоч оролцсон юм. Ийнхүү он гарснаас хойш “World Masters”, Парисын “Их дуулга”, Будапешт, Обервартад болсон “Дэлхийн цом”-д барилдаж, оролцсон тэмцээн бүрээсээ алтан медаль хүртээд байгаа жүдочид Европ тив дэх ээлжит тэмцээнээс шинэ аваргатай боллоо.

Медалийн хүснэгтэд манай баг 1 алт, 2 хүрэл медальтайгаар  5-р байранд жагслаа.  Япончууд 6 алт, 2 мөнгөн, 2 хүрэл медаль хүртэж энэ дэлхийн цомыг тэргүүлсэн юм.