Ромагийн шинэ дасгалжуулагчаар Винчензо Монтелла томилогдлоо. 36 настай экс-Ромагийн довтлогч улирал дуустал энэ үүргийг хүлээх бөгөөд хэрвээ сайн ажиллавал жинхлэх боломжтой юм. Клаудио Раньери ажлаа хүлээлгэн өгөх шийдвэрийг өнгөрсөн ням гаригийн тоглолтын дараа гаргасан бөгөөд түүнийг ийм зүйл хийнэ гэж багийн удирдлага төсөөлөөгүй байсан.

Тиймээс орлох мэргэжилтэнг хайж багагүй сандарсан. Ингээд эцэст нь клуын U-15 багийг дасгалжуулж байсан “Бяцхан онгоц” хочтой Монтелла дээр сонголт тогтсон юм.

Энэ тоглогчийн намтрыг бид өмнө нь та бүхэнд хүргэж байсан билээ. Монтелла 1999–2009 оны хооронд Ромад хүчин зүтгэхдээ нийт 194 лигийн тоглолтод 83 гоол оруулсан. 2001 онд тэр карьерийн оргил амжилтаа үзүүлж Сери А лигт багтайгаа хамт манлайлсан. 2009 оны зун Монтелла зодог тайлж Ромагийн U-15 багийн дасгалжуулагчаар ажиллаж байсан юм. Рома одоогоор лигтээ 39 оноотой 8-р байранд явна.