ДАШТ болсны дараа жил нь уг ДАШТ-нд багийн дүнгээрээ эхний найман байр эзлэсэн багуудын хороонд Дэлхийн цомын төлөө тэмцээн болдог. Өнгөрсөн жил ОХУ-ын Москва хотод болсон ДАШТ-нд монголын эмэгтэй баг 17 оноогоор наймдугаар байр эзлэсэн ч Дэлхийн цомын тэмцээн Франц улсад болох болсноос шалтгаалан манай багийг оролцуулахгүй болсон юм

Гэвч саяхан ФИЛА-гаас шийдвэр гарч тус тэмцээнд БНХАУ-ын багийн оронд 2011 оны гуравдугаар сарын 5-6–ны өдрүүдэд Франц улсын Леви хотод болох эмэгтэй багуудын Дэлхийн цомын төлөө тэмцээнд монголын багийг оролцуулах болсон байна. Уг тэмцээнд АНУ, Монгол, Казакстан, Канад, ОХУ, Франц, Швед, Япон гэсэн найман орны эмэгтэйчүүд өрсөлдөнө.

Уг тэмцээнд манай улсаас 48 килограммын жинд спортын мастер Чулуунбаатарын Ганчимэг, 51 килограммын жинд улсын хэмжээний мастер Даваасүхийн Отгонцэцэг, 55 килограммын жинд спортын мастер Сүндэвийн Бямбацэрэн, 59 килограммын жинд Гавьяат тамирчин Соронзонболдын Батцэцэг, 63 килограммын олон улсын хэмжээний мастер Очирбатын Насанбурмаа, 67 килограммын жинд олон улсын хэмжээний мастер Банзрагчийн Оюунтуяа, 72 килограммын жинд Гавьяат тамирчин Очирбатын Бурмаа нар барилдана.

Дасгалжуулагчаар эмэгтэйчүүдийн үндэсний шигшээ багийн дасгалжуулагч Гавьяат дасгалжуулагч Зэвэгийн Дүвчин, Гавьяат дасгалжуулагч Түмэндэмбэрэлийн Сүхбаатар, шүүгчээр олон улсын шүүгч Ойдовсамбуугийн Баянмөнх оролцоно.

Өнгөрсөн хоёр жилийн Дэлхийн цомын тэмцээнд манай баг оролцож тус бүр зургаадугаар байр эзлэж байжээ.