Зургийн тайлбар: Мөнхийн өрсөлдөгчид тоглохын өмнө. Цагаан өмсгөлтэй нь тавдугаар сургуулийн “Сэлэнгэпресс”, цэнхэр өмсгөлтэй нь 24 дүгээр сургуулийн “ДМЮ” клуб

МХБХ-ноос жил бүр зохион байгуулдаг футзалны өсвөр ба идэрчүүдийн УАШТ-ий медалийн төлөө өрсөлдөх багуудын нэр тодорлоо. Тэмцээний хуваарь ёсоор 17 насны хагас шигшээ тоглолт болж, гал гарсан халуухан тулааны эцэст “Хангарьд” “ЮБ Юнайтед”-ыг 4:3, “Дархан” “Шарын гол”-ыг 6:5-аар буулган авав. Д.Чулуунболд дасгалжуулагчтай 72 дугаар сургуулийн тоглогчдоор бүрдсэн “ЮБ Юнайтед” баг 3:1-ээр ялж явсан ч тоглолтын төгсгөлөө муу хийснээр харамсалтай ялагдал хүлээв. Тэд хасагдах шатанд “Эрчим”, “Хараацай” зэрэг хүчирхэг багуудыг мултлаад байсан билээ. Ямартай ч ахлах насны ангиллын цомыг Эрдэнэт, Дарханы багууд булаалдахаар шалгарч үлдэв.

УАШТ-ий 13 насны тоглолт хоёрдугаар сарын 8-11, 15 насны тоглолт 12-17 хооронд болсон билээ. Харин нас бүрийн медалийн төлөөх тоглолт 26-ны бямба гаригт УБДС-ийн зааланд болно. 13 насны ангилалд хүрлийн төлөө “Багануур” 24 дүгээр сургуулийн “Саммит ДМЮ” багтай өрсөлдсөнөөр медалийн төлөөх тоглолт эхэлнэ. Өнгөрсөн жилийн “Дуулиан-2020” тэмцээний хамгийн бага насанд аваргалсан “Саммит ДМЮ” аваргалах гол багаар нэрлэгдэж байсан. Тэдний багийн тоглолт, бөмбөг барилт зэрэг нь гайхалтай байсан ч хагас шигшээд учраа таарсан “Арвис”-ыг дутуу үнэлсний улмаас гуравдугаар байрын төлөө тоглох болоод байгаа билээ.

2011.02.26 Бямба гариг

09:00   13 нас хүрэл  Багануур        -Саммит ДМЮ

10:00   15 нас хүрэл  Хангарьд        -Сод титэм

11:00   17 нас хүрэл   ЮБ Юнайтед -Шарын гол

12:00   13 нас алт       УБДС              -Арвис

13:00   15 нас алт       Хараацай        -Хоромхон

14:00   17 нас алт       Хангарьд        -Дархан