Харри Реднапп Гарет Бейлийг АС Милантай хийх аваргуудын лигийн хариу тоглолтод эргэж ирнэ гэдэгт итгэлтэй байна. Уэльс хагас хамгаалагч нурууны бэртлээс болж сар гаран талбайд гарах боломжгүй болоод байсан юм. Харин энэ долоо хоногоос Бейл хөнгөн бэлтгэл хийж эхэлсэн мэдээ байна. Тиймээс 2 долоо хоногийн дараа АС Миланы эсрэг тоглох боломжтой гэсэн үг. Реднапп “Бейлээс гадна бусад бэртэлтэй тоглогчид ч эдгэрч байгаа. Манай багийн хувьд маш чухал тоглогч учраас үүнээс өөр сайхан мэдээ гэж юу байхав. Хариу тоглолтод Бейл тогловол бидэнд хамаагүй амар байх болно” гэсэн.

Бейл энэ жилийн аваргуудын лигт 7 тоглолтод 4 гоол оруулчихсан байгаа.

Сан Сирод явагдсан эхний тоглолтод Сперз Краучын нэг гоолоор хожил авсан . Гэхдээ Гаттузогийн зохисгүй авир тус тоглолтоос  таагүй дурсамж  үлдээсэн юм. Энэ талаар Харри “Би юу болсныг сайн харж чадаагүй. Нэг харсан чинь л Гаттузо Жое Жорданыг мөргөж байсан. Тийм ч олон хүн Жордантай ороолдохыг ер нь хүсдэггүй юм. Миний бодлоор Гаттузо буруу хүнээ сонгосон байх. Ирэх тоглолтод тэр үүнийг ойлгох болно” гэсэн.

“Давуу тал манайд байгаа ч гэсэн АС Миланыг дутуу үнэлж болохгүй. Тэдний аваргуудын лигийн туршлага үнэхээр гайхалтай. Тийм болохоор бид маш болгоомжтой хянуур тоглох болно”