Карлос Тевесийн албан ёсны бус агент гэгддэг Киа Журабчян түүнийг ирэх 2 жилийн хугацаанд Бразилд эргүүлж аваачна гэж ярьж байна. Энэ долоо хоногийн эхээр Тевесийн өмнөх баг Коринтианс Аргентин довтлогчоо дахин эгнээндээ нэгтгэх хүсэлтэй байгаагаа илэрхийлсэн юм. Хэдийгээр Тевес өөрөө энэ талаар ямар нэгэн мэдэгдэл хийгээгүй байгаа ч Журабчян Бразилийн хэвлэлүүдэд “Тэр Коринтианстс буцаж очихыг хүсэж байгаа. Энэ хүслийг нь биелүүлэхийн тулд би өөрөөсөө шалтгаалах бүхниийг хийж байна” хэмээн ярих болжээ. Мөн Журабчян Ман Юнайтедийн Андерсон, Тоттенхэмийн хаалгач Гомес нарыг ч Коринтианст амласан сураг байна.

Эхлээд сонсоход энэ яриа утгагүй зүйл юм шиг санагдаж болох ч Журабчяны ард байдаг “том” нөхдүүдийн тухай сонсоод таны бодол өөрчлөгдөх байх. Иран гаралтай бизнесмен  тэрээр тоглогч нарын наймаанд хөндлөнгөөс оролцож өөрсдөдөө ашигтай шийдвэр гаргуулж чаддаг  нэгэн. Түүний удирддаг MSI (Media Sports Investments) групын оролцоотойгоор 2007 оны зун Карлос Тевес, Хавьер Машерано нар Коринтиансаас Вэст Хэмд ирж байсан. Журабчянын дараагийн алхам нь Вэст Хэмийг худалдан авах байсан ч энэ төлөвлөгөө нь бүтэлгүйтсэний улмаас Тевес, Машерано нар ирэх өвөл нь Алхнуудыг орхисон билээ.

Гэхдээ Тевесийн Вэст Хэмд авчирахад гаргасан мөнгө MSI-ийнх байсан учраас одоо болтол Тевка MSI-тай холбоотой хэвээр байгаа. Журабчян мөн 2009 оны зун Робиньо Манчестер Ситид , өнгөрсөн зун Рамирес Челсид ирсэн наймаануудад оролцож багагүй мөнгө хожжээ.

Сүүлд гэхэд Тевесийн Ситигээс явах хүсэлтийг олон нийтэд зарлахад Киа гол үүрэг гүйцэтгэсэн мэдээ байна. Түүний удирдлага дор байдаг MSI-н санхүүжүүлэгчид албан ёсоор тодорхойгүй байдаг ч Челсигийн эзэн Роман Абрамович, Оросын бизнесмэн олигархи Борис ́ Березовский , түүний бизнесийн хамтрагч Аркадий   Патаркацишвили нар хувь эзэмшдэг гэсэн яриа байдаг юм.

Карлос Тевесийн хувьд Сититэй байгуулсан гэрээ нь 2014 онд дуусна. Түүнийг авахыг хүссэн баг дор хаяж 40 сая фунт гаргах ёстой бөгөөд долоо хоногийн 140.000 фунтын аварга цалинг нь бас аргалах ёстой болно. Гэхдээ  Журабчян “Мөнгө асуудал биш. Хамгийн гол нь Тевес өөрөө Бразилд тоглохыг хүсэж байгаа. Энэ оронд хайртай. Тийм болохоор би энэ наймааг боломжтой гэж үзээд байгаа юм” гэж байна.

Ситигийн дасгалжуулагч Роберто Манчини “Мэдээж би түүнийг багтаа үлдээхийг хүсэж байна. Гэхдээ ирээдүйд юу болоыг хэн ч мэдэхгүй шүү дээ” гэсэн утгатай ярилцлага өгчээ.

Тевес энэ улиралд 28 тоглолтод 21 гоол оруулаад байгаа.