Лондоны “Челси”-гийн довтлогч Дидье Дрогба, хаалгач Петр Чех хоёр сагсанбөмбөгт “нугасгүй”. Тэд NBA-гийн шимтэн үзэгч, Майкл Жорданыг шүтэн бишрэгчид гэдгээ илчилж “Лейкерс” болон “Селтикс”-ийн тухай хууч хөөрсөнийг хөрвүүлэн хүргэж байна.

-         Та хоёр сагсанбөмбөгт хэр дуртай вэ. Юунаас эхэлж дуртай болсон юм бэ?

-         Чех: Би дунд сургуульд байхдаа сагс тоглож үнэхээр их таашаал авдаг байсан. Майкл Жорданаас л болж сагс үзэж эхэлсэн юм. Тэр миний хамгийн хайртай, шүтдэг тоглогч байсан. Жордан л намайг сагст дурлуулсан.

-         Дрогба: Би ч бас сагсанбөмбөгт их дуртай. NBA-гийн тоглолтыг байнга үздэг. Майкл Жорданы ид үед сагст дуртай болсон.

-         Таны дуртай баг, сагсанбөмбөгч хэн бэ?

-         Чех: Түрүүн хэлсэнчлэн Майкл Жордан. Түүнийг тоглож байх үед “Чикаго Буллз”-ыг дэмждэг байлаа. Харин Жорданыг их спортоо орхисны дараа “Лейкерс”-ийн фанат болсон. Одоо бол миний дэмждэг сагсанбөмбөгч Коби Брайант.

-         Дрогба: Нэгийг нь онцолж нэрлэх амаргүй юм. Миний хувьд Майкл Жордан, Мэжик Жонсон, Ларри Берд агуу. Тэдний хамтдаа тоглосон “Мөрөөдлийн баг”-ийг шилдэг нь гэж боддог. Харин заавал нэгийг нэрлэ гэвэл Майкл Жорданг хэлнэ.

-         Энэ жил NBA-гийн аваргын төлөө ямар хоёр баг өрсөлдөх бол?

-         Чех: “Лейкерс”-“Селтикс” гэж бодож байна. Тэд сайн тоглож байна. Тэд аваргын төлөө тоглолтод өлхөн үлдэх боломжтой. Тэгээд ч ийм тоглолт л хамгийн сонирхолтой байх болов уу. Харж л байя, хэн нь үлдэхийг.

-         Дрогба: Би ч гэсэн “Лейкерс”-ийг “Селтикс”-ийн эсрэг тоглоосой гэж хүсч байна. Энэ бол үнэхээр агуу тоглолт. Гайхалтай шидэлтүүд, уур амьсгал, туршлага гээд бүх юм нь гайхалтай.

-         Тэгвэл аль баг нь энэ дуэльд хожих бол?

-         Чех: Миний дэмждэг “Лейкерс”-ийг хожно гэж найдаж байна.

-         Энэ улирлын MVP-ээр хэн тодрох бол?

-         Чех: Энэ шагналыг хүртэх боломжтой хэд хэдэн тоглогч бий. Гэхдээ “Лейкерс” аварга болвол багтаа оруулж буй хувь нэмрийнхээ үрээр Коби Брайант авна.

-         Дрогба: Хэрвээ “Селтикс”, “Лейкерс”-ийн аль нэг нь аварга болно гэж үзвэл Коби юмуу Гарнетт л авах байх. Тэд маш сайн сагсанбөмбөгчид, бас ширүүн өрсөлдөгчид.

-         Та NBA-гийн тоглогчдоос хэнтэй нь уулзахыг хүсч байна вэ?

-         Чех: Хэрвээ хэн нэгийг нь сонго гэвэл би Жорданг л сонгоно. Би түүнтэй уулзаж байгаагүй. Тиймээс түүнтэй л уулзахыг хүснэ.

-         Дрогба: Би Коби Брайант, Кевин Гарнеттай уулзаж байгаагүй. Гэхдээ би нэг хүн гэвэл бас л Жордантай уулзахыг хүснэ.

-         Гуравдугаар сарын 2-нд Торонто, Нью-Жерсигийн алийг нь дэмжих вэ?

-         Чех: Нью-Жерсиг. Гэхдээ надад Саша Вуячичийн тоглолт таалагддаг.

-         Дрогба: Хэлэхэд хэцүү л юм. Гэхдээ Нью-Жерсигийн одоогийн тоглолт илүү таалагддаг. Тэгэхээр тэднийг л дэмжинэ.

-         Та одоо ч сагсанбөмбөг тоглодог уу?

-         Чех: Үгүй дээ, хөлбөмбөгийн ажил минь их болохоор тоглоод байх боломж бараг үгүй. Боломж олдвол хэд шидчих санаа байдаг л юм. Хүүхэд байхдаа хөлбөмбөгийн дугуйлангийн хажуугаар сагсны дугуйланд бас гүйдэг байлаа.

-         Дрогба: Зав гаргах хэцүү л дээ. Гэхдээ тоглох боломж гаргахыг боддог шүү.

-         Таны хөлбөмбөгийн арга барилыг сагсанбөмбөгт буулгавал хэнтэй илүү төстэй тоглолттой бол?

-         Чех: За үнэхээр хэлэхэд хэцүү юм байна. Шакил О Нил юмуу даа. Тэр цагаригаа сайтар хамгаалах үүрэгтэй. Тэгэхээр түүнийг л нэрлэе.

-         Дрогба: Би бол Коби Брайантыг хэлнэ. Тэр ялалтын төлөө улайран зүтгэдэг. Тийм ээ Коби.

-         Сүүлийн асуулт. Та Олимпийн наадмын сагсанбөмбөгийн тэмцээнийг үзэх үү?

-         Чех: Хэрвээ боломж олдвол дуртайяа хэдэн тоглолт үзнэ.

-         Дрогба: Манай улсын шигшээ баг орох эсэхийг сайн мэдэхгүй юм. Орж чадахгүй байлаа ч гэсэн сагсанбөмбөг үзнэ ээ.

 

 

Дрогба, Чех: “Лейкерс”-“Селтикс” NBA-гийн аваргын төлөө тоглоосой , 8.4 out of 10 based on 7 ratings