Францын шигшээ болон Английн “Челси”-гийн хасаг хамгаалагч Флоран Малуда электромашин унаж, олны нүдийг орой дээр нь гаргах болжээ. Түүний унаж буй “Тесла” компанийн машин овроор тун бага ч байгаль орчныг бохируулдаггүйгээрээ давуу талтай гэнэ. “Манай багийн тоглогчид намайг юу унаад яваад байгааг шалгаадаг. Зарим нь “өхөөрдмөөр тэрэг” гэх мэтээр дооглож л байдаг юм. Гэхдээ би тэдэнд электромашины давуу тал болон жолоодоход бусад машинаас огт ялгаагүй гэдгийг нь сайтар хэлж өгсөн. Хөдөлгүүрээ асаахад ямар ч дуу гардаггүй нь тэднийг бүр алмайруулсан” гэж Малуда ярьжээ. “Заавал байгаль орчинд хортой, утаа гаргадаг автомашин унах хэрэг юу байна. Электромашин бол ирээдүйн унаа. Тиймээс ч би үүгээрээ бахархаж байгаа. Мөдхөн гэр бүлийн электромашин гаргана гэсэн түүнийг нь тэсэн ядан хүлээн байна” гэж тэрээр яриагаа үргэлжлүүлжээ. Харин өндөр хүмүүс энэ электромашиныг жолоодож болох эсэх тухайд “Манай багийн өндөр залуус үүнийг сонирхоод байгаа юм. Гэхдээ ирээдүйн машин болохоор мэдээж мөдхөн том оврынх нь гарах биз дээ” гэж Флоран Малуда тайван хариулжээ.