Сэр Алекс Фергюсоны “Улаан чөтгөрүүд” Роман Абрамовичийн эрин эхэлснээс хойш “Челси”-г талбайд нь хожоогүй байгаа билээ. Гэвч өнөө орой хожихын тулд бүхнээ хийх биз.

“Челси”-гийн дасгалжуулагч Карло Анчелотти таагүй хэрэгт орооцолдоод буй Эшли Коулыг ямар ч байсан орой талбайд гаргана гэж мэдэгдсэн. Мөн Дрогба, Торрес нар тоглоно гэдгийг баттай хэлжээ.

Гэхдээ 4-3-3 юмуу 4-4-2 загварын алийг нь хэрэглэхээ хэлэхээс татгалзав. “Тоглолт болтол модоо дэлгэхгүй. Гэхдээ 4-4-2 тохирох загвар байж болох юм. Ингэж тогловол бид бөмбөг бага эзэмших ч гэсэн довтлох боломж түлхүү олдоно. Довтлогч нарынхаа хурдыг ашиглаж тоглоно гэвэл энэ ашигтай. Харин нөгөө загвараар бол бид бөмбөг илүү эзэмшинэ. Гэхдээ бид юунд хүрэхийг зорьж буйгаасаа л шалтгаалж загвараа сонгоно” гэж Карло Анчелотти хэлсэн байна. Мөн тэрээр Неманья Видичийн хувьд Торрес тун эвгүй гэдгийг сануулжээ.

Харин Торрес тоглолтын өмнө “Рио Фердинанд тоглож чадахгүй нь харамсалтай” хэмээн хүчирхэг өрсөлдөгчтэй тоглох сайхан байдаг гэх утгатай үг хэлжээ. Рио Фердинандын оронд энэ тоглолтод Крис Смоллингийг гаргах нь бараг тодорхой байгаа юм.

Анелька тодорхой зай шаардаж тоглодог онцлогтой тоглогч. Тэр урдаа зай гарсан тохиолдолд сайн тоглодог, харин шахаж тоглоход тун дадаагүй. “Манчестер Юнайтед”-ийнхан энэ тоглолтод зай гаргалгүй нягт хамгаалах магадлал өндөр тул Анелькаг нөөц рүү илгээх магадлал их.

Сэр Алекс Фергюсон одоогоор тоглолтын тухай мэдээлэл хийгээгүй байна. Харин Нани “Биднийг хоёр хүнд тоглолт хүлээж байна. “Челси”, “Ливерпуль”-тай дараалан тоглох хүнд байх болно” гэж жижүүрийн үг хэлжээ.

Энэ тоглолтод Хавьер Эрнандесийг гаргах эсэх нь мэргэжилтнүүд болон хөлбөмбөг сонирхогчдын анхаарлыг ихэд татаж байна. Өмнөх тоглолтод “Уиган”-ын хаалганд дубль хийсэн Эрнандесийг Сэр Алекс ихэд магтсан юм.

Сэр Алекс хүчтэй өрсөлдөгчдийнхөө эсрэг 4-5-1 гэсэн загварыг илүүд үзэж байгаа нь анзаарагддаг. Энэ тохиолдолд ихэвчлэн Руни гарч, Бербатов, Эрнандес нар “сууж” таардаг. Гэтэл Харгривз, Андерсон, Пак Жи Сун, Антонио Валенсиа нар бэртэлтэй байгаа тул хагас хамгаалалтад Гиггз, Нани, Флетчер, Скоулз, Кэррик, Гибсоноос сонгоно. Хагас хамгаалалтанд ийм олон тоглогч бэртэлтэй байгаагийн дээр Обертан, Бебе нар багийнхаа хэмжээнд хүрэхгүй байгаа нь тоглолтуудас тодорхой байгаа билээ. Тиймээс хагас хамгаалагчийн асуудалдаа ороогдон хоёр довтлогч гаргахыг ч үгүйсгэхгүй.

Харин “Челси” 4-4-2-ийг сонговол Рамирес, Малуда нар жигүүрээс төв рүү хандсан маягаар тоглох болов уу. Тэд “Копенгаген”-ы эсрэг яг ингэж тоглосон. Төвд Лампард, Эссьен гарч, хэрэгтэй гэж үзвэл Микелийг ч цэвэрлэгээнд дуудна.

“Улаан чөтгөрүүд”-ийн сул тал нь хамгаалалт болж байна. Ялангуяа залуухан Крис Смоллингийн хэрхэн тоглохоос маш их зүйл шалтгаална. Видич Фердинандаас бусад хамгаалагчтай тоглохдоо сандарч, санаа зовж буй байдал илт мэдрэгддэг.

Харин “Челси”-гийн хувьд өөртөө тун итгэлтэй шинэ залуу Давид Луистаа бүрэн найдах магадлалтай. Иванович, Терри, Коул зэрэг хашир тоглогчид том алдаа гаргахгүй биз.

“Манчестер Юнайтед”-ийн хувьд Видич, Смоллинг, Эвра дээр баруун захдаа хэнийг тавих вэ гэсэн асуудал бий. Хэрвээ О Шиг тавибал илүүтэй хамгаалж тоглохын дохио, харин Рафаэл тавибал үе үе урагш довтлох тактикийг илүүд үзсэн хэрэг болох билээ. Рафаэл сүүлийн үед ур чадварын хувьд эрс өсч, дэлхийн ямар ч одын эсрэг тоглож чадахаар болсон. Гэхдээ хэт шатах аюултай тоглогч гэдэг нь харагдаад байгаа билээ.

Тоглолтыг Мартин Аткинсон шүүх юм байна. Тэрээр энэ улиралд Премьер лигийн 28 тоглолт шүүснээс 94 шар, 9 улаан хуудас өргөсөн юм. Энэ нь нэг тоглолтод дунджаар 3.7 хуудас ногдож байгаа хэрэг.

Багуудын мэдүүлгийг танилцуулья.

«Челси»: Чех, Тернбулл, Босингва, Феррейра, Иванович, Терри, Луис, Жирков, Коул, Микел, Эссьен, Лампард, Рамирес, МакИхрэн, Малуда, Калу, Дрогба, Анелька, Торрес

Гэмтэлтэй: Алекс, Бенаюн

«МЮ»: ван дер Сар, Кушчак, Линдегаард, О Ши, Рафаэл, Смоллинг, Видич, Браун, Эвра, Фабио, Нани, Каррик, Флетчер, Скоулз, Гибсон, Гиггз, Руни, Бербатов, Эрнандес, Бебе, Обертан

Гэмтэлтэй: Пак, Андерсон, Харгривз, Валенсиа, Фердинанд, Эванс

“Стэмфорд Бридж” дэх сүүлийн тоглолтууд:
1992/93  тэнцээ1:1
1993/94  хожил «Челси» 1:0
1994/95  хожил «МЮ» 3:2
1995/96  хожил «МЮ» 4:1
1996/97  тэнцээ 1:1
1997/98  хожил «МЮ» 1:0
1998/99  тэнцээ 0:0
1999/00  хожил«Челси» 5:0
2000/01  тэнцээ1:1
2001/02  хожил «МЮ» 3:0
2002/03  тэнцээ 2:2
2003/04  хожил «Челси» 1:0
2004/05  хожил «Челси» 1:0
2005/06  хожил «Челси» 3:0
2006/07  тэнцээ 0:0
2007/08  хожил «Челси» 2:1
2008/09  тэнцээ 1:1
2009/10  хожил «Челси“ 1:0