“Фулхэм”-тэй тэнцсэний дараа “Манчестер Сити”-гийн дасгалжуулагч Роберто Манчини тоглолтуудыг хэт шахуу товлосон нь хүндрэл учруулж буйг дурслаа. “Адам Жонсон гэмтэл авмагц манай багийн бүрэлдэхүүнд асуудал үүсч эхэлсэн. Түүнээс гадна хэд хэдэн тоглогч бэртэлтэй байна. Гэтэл Жонсон дөнгөж сарын дараа л талбайдаа эргэн ирнэ. Хөлбөмбөгчид их ядарч байна. Миний мэдэлд одоогоор тоглож чадахаар 14 хөлбөмбөгч л байна. Гурав хоног тутамд тоглоно гэдэг дэндүү давчуу байна. 48 цагийн дараа дахиад тоглоно гэдэг маш хэцүү. Энэ л том асуудал болоод байна. Бид лигт гуравдугаар байр эзэлж, Английн цомд түрүүлэх зорилготой. Хамгийн гол нь Аваргуудын лигт үлдэх ёстой. Гэтэл өрсөлдөгч нар ч ширүүн байна. “Тоттенхэм” нэг тоглолт дутуу хэрнээ гурван оноогоор хоцор яваа, харин “Челси” хоёр тоглолт дутуу хэрнэ таван оноогоор биднээс хоцорч байна” гэж Робертон Манчини ярьжээ.