Колумбын “Атлетико Хуниорс”-“Депортиво Перейра” багийн тоглолтын үеэр нэгэн шар шувуу стадионы хүчтэй гэрэлтүүлэгт цохигдон талбайд унасан нь хөлбөмбөгийн хүрээнээс хальсан том шуугиан дэгдээлээ. Тоглолтын 74 дэх минутад шар шувуу талбайд унасан байна. Стадионы хамгаалагч нар ирэхээс өмнө зочин багийн хөлбөмбөгч, панам залуу Луис Морено шар шувууг хэдэн метр хол үсэртэл нь өшиглөж орхижээ. Гэтэл нутгийн иргэдийн сүжгийн дагуу бол шар шувуу амжилт, аз авчирдаг аж. Тиймээс стадион цугласан үзэгчид “Алуурчин! Алуурчин! Алуурчин!” хэмээн уурсан хашгирсан байна.

Тиймээс шар шувууг өшиглөсөн хөлбөмбөгчийг үзэн ядсан үзэгчдээс хамгаалахын тулд цагдаагийнхан бүрэн хамгаалалтандаа авч стадионоос гаргаж өгчээ.

Тоглолтын дараа Колумбын зарим цахим хуудсанд шар шувуунд хүчээ гаргасан эрийг цаазлахыг шаардсан мэдээлэл хүртэл гарсан гэнэ. Мөн байгаль орчин, ан амьтныг хамгаалах нийгэмлэгийнхэн Колумбын хөлбөмбөгийн холбооны үүдэнд цуглан эсэргүүцэл илэрхийлсэн байна.

Гэлээ ч хөлбөмбөгч Луис Мореног шийтгэх үндэслэл байхгүй юм. Учир нь тус улсын хуулинд амьтантай зэрлэг харилцсан этгээдэд шийтгэл тооцох заалт огт байдаггүй ажээ.

Үзэн ядалтын бай болсон панам залуу Луис Морено Колумбын ард түмнээс уучлалт гуйсны зэрэгцээ тоглолтоо хурдан үргэлжлүүлэхийн тулд л шувууг өшиглөснөө, өшиглөхөөр завдахыг мэдрээд нисчих байх гэж бодсоноо хэлжээ.  Шар шувууны хэд хэдэн эрхтэн гэмтсэн ч аминд халгүй гэж эмч нар мэдэгджээ.