Коло Туре сэргээшийн шинжилгээнд унасан нь томоохон сенсаац дэгдээгээд байна. Өнгөрсөн мягмар гаригт Астон Виллатай хийсэн ФА цомын тоглолтын өмнө Туре багийнхаа бүрэлдэхүүнээс хасагдсан. Учир нь түүний шинжилгээнэс хориотой бодис илэрсэн учраас   бүх зүйл шийдэгдтэл тодорхойгүй хугацаагаар  үндсэн багийн бэлтгэл болон тоглолтод оролцохыг хориод байгаа юм.

Сүүлд 2004  онд Адриан Муту хар тамхи хэрэглэсэн хэргээр шийтгэгдэж байснаас хойш ийм явдал гараагүй байсан. Коло Турегийн А  шинжилгээ эерэг үр дүнтэй гарсан бөгөөд хэрвээ B сорьцоор энэ нь дахин баталгаажвал шийтгэл хүлээх юм. “Дэлхийн  сэргээшийн эсрэг агентлаг”-ийн дүрэм ёсоор  тамирчинд 2 жил хүртэлх хугацаагаар спортоос ангид байх шийтгэл оногдуулдаг.

Коло Туре өөрөө энэ бүхнийг санамсаргүй явдал гэж тайлбарлаж байгаа. Тэрээр жингээ хасах зорилготой эхнэрийнхээ тураах эмнээс бага зэрэг хэрэглэсэн гэжээ.

Кологийн экс- дасгалжуулагч Арсен Венгер  энэ талаар “Сонин юм даа. Коло энд байхдаа ямар ч асуудалд орооцолдож байгаагүй.  Коло үргэлж гэр бүлийнхэнтэйгаа хамт байдаг их шударга, сайн залуу шүү дээ. Сайн тоглохын тулд сэргээш хэрэглэх хүн биш” хэмээсэн байна.

Туре 2009 онд 16 сая фунтээр Арсеналаас Ситид ирж байсан. Энэ улиралд Кот-д’Ивуар тоглогч 22 тоглолтод талбайд гарч 1 гоол оруулаад байгаа. Харин дээрхи сэргээшийн асуудлаас болж Туре улирал дуустал багтаа тус болж чадахгүй болоод байна.