Ман Юнайтед он гарснаас хойш хэд хэдэн тоглогчидтойгоо шинэ гэрээ байгуулаад байна. Хамгийн сүүлд тэд Шотланд хагас хамгаалагч Даррен Флетчертэй 4 жилээр гэрээгээ сунгажээ. Түүний өмнө Райн Гиггз (, Патрис Эвра , Андерсон, Майк Каррик нар Улаан чөтгөрүүдэд үнэнч үлдэхээ цаасан дээр амлаж гарын үсгээ зураад байсан юм.

Өдгөө 27 настай Флетчер  2003 онд Ман Юнайтедийн төлөө анхны тоглолтоо хийж байлаа. Тэр цагаас хойш 8 жил өнгөрсөн бөгөөд  Флетчер улаан өмсгөлтэй 288 удаа талбайд гарч нийт 21 гоол оруулаад байгаа. Олон байрлалд тоглох чадвартай энэ залуу Сер Алекс Фергусонд үнэлж баршгүй тоглогч гэгддэг. “Даррен энэ багт 15-тайгаасаа хойш байна. Манай багийн хүүхдийн багаас ийм сайн тоглогч төрж гарсанд би үнэхээр бахархдаг. Тэр өөрийгөө дэлхийн түвшний тоглогч гэдгээ альхэдийнэ нотолсон.”

Харин Флетчер “Ман Юнайтедийн төлөө тоглох нь нэр төрийн хэрэг. Өнгөрсөн жилүүдэд би маш олон цом шагнал багтайгаа хамт хүртэж үзсэн. Ирэх жилүүдэд ч энэ бүхэн үргэлжилнэ гэж найдаж байна. Багийнхаа бүх андуудад баярлалаа” хэмээжээ.

Улаан чөтгөрүүд яг одоо 60 оноотой премьер лигийн хүснэгтийг тэргүүлж байгаа.