Филиппиний шигшээ баг өнөөдөр Японд газардлаа. “Азкалс”  энэ сарын 13 хүртэл Арлын оронд  бэлтгэл хийж байгаад Улаанбаатарт ирэх юм байна. Филиппинчүүд саяхныг хүртэл нутгийнхаа хамгийн өндөрт оршдог Бугайод хотод эрчимжүүлсэн бэлтгэл хийж байсан юм. Тэр хугацаандааа “Азкалс орон нутгийн хоёр ч багтай нөхөрсөг тоглолт хийгээд амжсан бөгөөд   ” 9 : 1, 10 : 0 гэсэн харьцаатай өрсөлдөгчөө бут ниргэсэн гэнэ. Нутгаасаа хөдлөхийн өмнө тэд хэвлэлийнхэнтэй уулзаж ярилцлага өгөхдөө Хөх чононуудыг хожно гэдэгтээ итгэлтэй байгаагаа өгүүлжээ. Тухайлбал эхнийн тоглолтод гоол оруулсан Калигонг “Монголын хүйтэн цаг агаар бидэнд хүндрэл учруулж магадгүй. Бусдаар бол санаад зовоод байх юм алга. Тоглолт болох үед нэмэх градус хүрчихээсэй” хэмээжээ.

Дашрамд дуулгахад Филиппиний дасгалжуулагч дараагийн шатанд хэрэг болно хэмээн Испаний 3-р дивизионд тоглодог Сити Ронда гэх нуруулаг довтлогчыг бүрэлдэхүүндээ багтаасан гэнэ.

Манай шигшээ багийн хувьд Эрдэнэт хотод эрчимжүүлсэн бэлтгэл хийж байгаад саяхан нийслэл эргэн ирсэн.  ”Хөх Чононууд”  Олимпийн хорооны хажууд  спорт эрдэм шинжилгээний төвд  тоглолт болтол байрлах юм. Маргааш 13 цагаас МХХ-ны ногоон талбайд Олон улсын эмэгтэйчүүдийн баярт зориулсан тэмцээн болно. Мөн үндэсний шигшээ баг U-17 багтай нөхөрсөг тоглолт явагдах юм. Хөлбөмбөг сонирхогч та бүхнийг өргөнөөр хүрэлцэн ирж шигшээ багаа дэмжихийг уриалж байна.