Сагсан бөмбөг сонирхогчидын үзэх дуртай NISSAN premier лиг хэдэн өдөр завсарласаны дараа 3сарын 7-ны өдрөөс эхлэн үргэжилэн явагдлаа. Эхний тоглолт Хас банкны “Хүлэгүүд” , TLG төрийн бус байгууллагын “TLG-13”  багуудын учраагаар эхэллээ. Хэдийгээр хожлын хувьд тийм ч сайн амжилт гаргахгүй байгаа ч тоглолтын хувьд энэ жилээс чамгүй сайжирсан TLG-ийнхэний хувьд аваргуудтай ширүүхэн өрсөлдлөө.Эхний хоёр үед ялагдал хүлээн гуравдугаар үед Хүлэгүүдийг хошуучилж чадсан ч тоглолт ур чадвар, хамгаалалтын хувьд тааруухан байснаас 88:76 харьцаатай ялагдал хүлээлээ.

Хоёдахь тоглолт ШШГЕГ, Сүлд спорт хорооны “Офицерууд”, Mill house  компаны “Аватар”–уудын тулаанаар үргэлжилсэн юм. Эхний үеэс л эн тэнцүүхэн өрсөлдсөн багуудын тоглолт олон үзэгчидын анхаарлыг татаж байсан. Өмнөх тойрогт Аватаруудад ялагдал хүлээгээд байсан Офицерууд энэ удаа даагаа нэхэн ширүүхэн тоглож байсан ч 98:101 харьцаатайгаар Аватарууд ялалт байгууллаа. Тоглолт дуусхаас сүүлийн хориод секундэнд Офицерууд тооны харьцааг тэнцүүлэн нэмэлт цагт ялагч тодруулах нөхцөлийг бүрдүүлэх боломж байсан ч харамсалтайн тэдний хэд хэдэн удаагийн амжилтгүй шидэлт энэхүү боломжийг нь талаар болгосон юм.

Энэ өдрийн сүүлийн ширүүхэн тоглолт МУИС,  Бридж констракшины “Баянзүрх Бүллс”, Энержи ресурс ХХК-ны “Харцага”-уудын учраа байлаа.  Эхний халз тулаанд Бухнууд тэргүүлээд байсан бол энэ удаа тэд хожлынхоо буухиаг үргэлжлүүлэх үү? Аль эсвэл багуудын  хожлын харьцаа тэнцэх үү?  гэдэг нь шийдэгдэхээр байлаа. Харцагууд, Бухнуудын эсрэг хамгаалалт довтолгоон дээрээ сайн ажиллаж чадсанаар  тоглолтын эхнээс л санаачлагыг гартаа аван тэргүүлж эхэлсэн. Харин Бухнууд онооны харьцааг хэд хэдэн удаа тэнцүүлж чадсан ч эцсийн үед 65:78 харьцаатай ялагдал хүлээлээ.Ийнхүү Харцагууд хожлыг тэнцүүлж чадсанаар дараагиыйн тойрогт аль нь тэргүүлэх эсэх нь таавар болж үлдлээ.