“Challenge cup” тэмцээний урьдчилсан шатны хариу тоглолт маргааш хөлбөмбөгийн холбооны ногоон талбайд явагдана. Олон нийтийн анхаарлын төвд байгаа уг тоглолтын өмнөх хэвлэлийн бага хурал  өнөөдөр 13 цагаас МХХ-ны хурлын танхимд явагдлаа.

Хэвлэлийн бага хуралд Монголын хөлбөмбөгийн холбооны ерөнхий нарийн бичгийн дарга Д.Тэрбаатар, шигшээ багийн ахлах дасгалжуулагч С.Эрдэнэбат, шигшээ багийн ахлагч Д.Лүмбэнгарав болон Филиппиний шигшээ багийн дасгалжуулагч Михайль Вэйсс,  Филиппиний багийн хамгаалагч Рей  Палмес нар оролцож сэтгүүлчдэд мэдээлэл өглөө. Мөн шигшээ багаа дагалдаж ирсэн Филиппиний төв телевизийн сурвалжлагчид уг хуралд оролцсон юм.

Михайль Вэйсс уг хэвлэлийн бага хурлын үеэр “Монголын хүйтэн цаг агаарт дасан зохицоход мэдээж бидэнд хүнд байх болно. Гэхдээ Японд хийсэн бэлтгэл багагүй тус боллоо. Тэгээд ч мэргэжлийн хөлбөмбөгчдийн хувьд ямар ч цаг агаарын нөхцөлд тоглох чадвартай байх ёстой” хэмээсэн. Гэхдээ өмнө нь “Азкалс” Монгол шиг хүйтэн оронд тоглож зочилж байгаагүй гэдгийг тэрээр онцолсон.

Михайль Вэйсс багийн үндсэн хаалгач Этеридж тодорхой шалтгааны улмаас энэ тоглолтод оролцох боломжгүй болсон. Энэ нь өрсөлдөгчөө басаж, дутуу үнэлсэн хэрэг бус гэдгийг хэлж байлаа. “Монголын шигшээ залуучуудаас бүрдсэн эрч хүчтэй сайн баг гэдгийг өмнөх тоглолтод бид харсан. Тийм болохоор маш хянамгай тоглохыг хичээнэ” хэмээв.

Монголын шигшээ багийн ахлах дасгалжуулагч С.Эрдэнэбатаас довтлогч Г.Төгсбаярын бэртлийн талаар тодрууллаа.

“Төгсөө бэлтгэлийн үеэр гуяндаа бага зэргийн бэртэл авсан. Гэхдээ шигшээ багийн эмч нар үзээд маргааш болох тоглолтод оролцох боломжтой гэж үзсэн. Тийм болохоор багийн тактик болон бүрэлдэхүүнд нэг их өөрчлөлт орохгүй байх”

“Мэдээж эхний тоглолтод ялагдсан учраас бид заавал ялах даалгавартай байгаа. Хүссэн үр дүнгээ авахын тулд хичээх болно”

Шигшээ багийн ахлагч Д.Лүмбэнгарав “Манай багийнхэн бие болон сэтгэлзүйн хувьд бүрэн бэлтгэгдсэн гэж дүгнэж байна. Хожил авахын тулд өөрсдөөсөө шалтгаалах бүхнийг хийнэ” хэмээв.

Маргаашын тоглолтыг МУ-н ерөнхийлөгч Ц.Элбэгдорж, Хотын дарга Г. Мөнхбаяр зэрэг төрийн түшээд ирж үзэх учраас харуул хамгаалалт нилээд чанга байхыг анхааруулж байлаа. Мөн шүглийн 13.00 цагаас дуугарах учраас үзэгчдийг цагаа барихыг хүсэж байв.

МХХ-ны түнш байгууллага “Делта Сервис” компани тоглолтын “man of the match”-г нэг сая төгрөгөөр урамшуулах тухай мөн энэ бага хурлын үеэр мэдээлсэн.

Филиппиний шигшээ багийн бэлтгэл хийж  байсан Япон оронд байгалийн гамшигт үзэгдэл болж олон хүн амь эрсэдсэн нь тус улсын тоглогчдод сэтгэл санааны дарамт учруулсан. Тиймээс энэ бүхнээ мартаж, Монгол оронд тавтай морил хэмээн МХХ-ны ерөнхий нарийн бичгийн дарга Д.Тэрбаатар зочдоо хүндэтгэсэн юм.

Хэвлэлийн бага хурлын үеэр шигшээ багийн  тэнгэрийн өнгөтэй  шинэ өмсгөлийг танилцуулсан. Үүний дараа үндэсний шигшээ багийн бэлтгэл  ногоон талбайд үргэлжилсэн юм.