Өнөөдөр Шальке 04 багийн хяналтын зөвлөл  шуурхай хуралдаж,  дасгалжуулагч Феликс Магатыг халах шийдвэр гаргав. “ Шальке 04 –ийн  зүгээс энэ ийм шийдвэрт хүрэх маш тодорхой шалтгаан бий. Үүнийг бид олон нийтэд ил зарлахгүй яагаад гэвэл асуудлыг удахгүй хууль хяналтын дагуу  шийднэ. Бид энэ үйл явцыг тайван хүлээж байна” хэмээн хяналтын зөвлөлийн  дарга Клеменс  Төньнес хэлжээ.

Үүний сацуу Шалькегийн удирдах зөвлөлийн үүргийг шинээр зохион байгуулав. Спортын болон олон нийтийн харилцааг Хорсд Хельдт   хариуцаж, харин Петр Петерс ерөнхий удирдрлага  болон санхүү,  маркетингийг  хариуцах гэнэ.

Өнгөрсөн улиралд Магатын дасгалжуулсан Шальке 04 баг Бундеслигийн дэд аварга болсон хэдий ч энэ улиралд тун тааруу амжилт үзүүлж байгаа юм.  Холбооны цомын финалд шалгараад байгаа  Шальке 04 нь  аварга болвол Европын цомд оролцох эрхтэй болох юм. Мөн тэд аваргуудын лигийн сүүлийн 8-д шалгараад байгаа билээ.

Дасгалжуулагч Магатын оронд туслах дасгалжуулагч Иозеп Айхкорн үүрэгт ажлыг нь авч байна. Гэхдээ Германы хэвлэлүүдэд мэдээлэлсэнээр 2004-2005 онд Шальке 04 – ийг дасгалжуулж байсан Ральф Рангник эргэж ирэх болжээ. Шинэ улиралаас үүрэгт ажлаа  авхаар болсон ч түүнээс  өмнө анхны тоглолтоо 4-р  сарын 1нд  Сант Паулигийн эсрэг хийнэ гэж таамаглаж байгаа аж .Ральф Рангник нь Хоффенхаймийг дасгалжуулж  гайхалтай амжилтанд хүргэж байсан. Харин өвлийн арилжаа наймааны үеэр багийн удирдлагуудтай санал зөрөлдөж өөрийн саналаар Хоффенхаймийг орхисон юм.