Дэвжээнээсээ гарч хоол идэхдээ энгийн хувцастай явсан гэх шалтгаанаар озэки Барүто хатуу сануулга авчээ. Гуравдугаар сарын 16-нд олон нийтийн газарт энгийн хувцастай явсныг маргаашийнх нь хэвлэлүүдэд мэдээлсэн бөгөөд 18-нд Холбооны Ёс зүйн хорооны дарга Нишёносэки ояката Барүтог багш Оноэгийнх нь хамт дуудаж уулзаад тийн банга хүртээсэн аж.

Энэ нь Барүтогийн Сүмогийн холбооноос авч буй гурав дахь сануулга нь юм. Тэрбээр 2007 оны аравдугаар сард архи ууж согтуурхсан, 2009 оны аравдугаар сард мөн л энгийн хувцастай явж байгаад гудамжинд тавьтаргүй аашилсан гэсэн шалтгаанаар Холбоонд дуудагдаж байв.