Биеийн тамир, спортын төв номын сангаас “Ном-бидний нөхөр” аяныг нийт спортын холбоодуудын дунд зарлаад байгаа билээ. Тус аяны хүрээнд өнөөдөр Сагсан бөмбөгийн холбоо, Боксын холбоо, Үндэсний бөхийн холбоо, Спорт бүжгийн холбоо болон Засгийн газрын хэрэгжүүлэгч агентлаг Биеийн тамир спортын газрын дэргэдэх Сургалт, судалгаа, арга зүйн нэгдэл ном гардуулан өглөө.

Одоогийн байдлаар Биеийн тамир, спортын төв номын сангаас “Ном-бидний нөхөр” аянд Монголын хөнгөн атлетикийн холбоо, Софт теннисийн холбоо, Шатрын холбоо, Даамын холбоо, Сагсан бөмбөгийн холбоо, Олимпийн боксын холбоо, Үндэсний бөхийн холбоо, Спорт бүжгийн холбоо хамрагдаад байна. Улсын хэмжээнд Биеийн тамир спортын 70 гаруй холбоо үйл ажиллагаа явуулдаг байна. Эдгээр холбоодууд салбарын номын сандаа өөр өөрийн төрлийн ном сурах бичиг болон тоглолт, тэмцээн уралдааны бичлэг өгөх бүрэн боломжтой юм.

Дашрамд сонирхуулахад Монголын хөнгөн атлетикийн холбоо хамгийн анхны хандивлагч холбоо болсон бол Монголын үндэсний бөхийн холбоо Үндэсний бөхийн спортын бүтэн түүхийг өгүүлсэн товхимол өгсөнөөрөө бусад спорт холбоодоос ялгарч байна. Энэ үйл ажиллагаанд бусад холбоодыг ч идэвхтэй оролцохыг уриалж байна. Спортын төв ордонд байрлах Биеийн тамир спортын төв номын санд долоо хоног бүрийн 13.30 цагт ном хүлээн авч байгаа юм.