Копуудын хувьд шилжилтийн хүндхэн үе үргэлжилсээр байна.  Улирал эхлээд удаагүй байхад Ливерпулийн фенүүдийн итгэлийг алдсан Яанк эзэд болох Жорж Жилетт, Том Хикс нар нилээд удаан суудлаасаа чангаасны эцэст байраа тавьж өгсөн. Тэдний орыг залгасан Бостонд байрлалтай ”New England Sports Ventures” компани Рой Хожсоныг улирал дуустал албан тушаалд нь үлдээх шийдвэр гаргасан нь бас л шүүмжлэл дагуулсан. Тухайн үед “Улаанууд” хүснэгтийн хомоол хамагч 18-р байранд бичигдэж, жинхэнэ хямарч байсан болохоор Хожсонд итгэх итгэл төдий хэмжээгээр багасаад байлаа.

Эрхбиш шинэ эзэнтэй болсон юм байна сайхан цаг ирэх байх гэж тэд найдаж байсан ч бүх зүйл бахь байдгаараа. Баг нь оноо алдсаар Хожсон өөрийгөө өмөөрсөөр он гаргасан. Ингээд Английн хамгийн аугаа түүхтэй багийн нэр хүндийг “шороо”-той хутгаж орхисон Рой Хожсон шинэ он гарснаас    долоо хоногийн дараа л  Ливерпулийг орхиж олон хүмүүсийн санааг амраасан билээ. Харин түүний орыг хэн залгах нь маргаантай сэдэв болж байлаа. Клубын домогт тоглогч асан Кенни Дэлглишт итгэх хүн олон байсан бөгөөд тэр ч ёсоор болж улирал дуустал “Хаан Кенни” түр дасгалжуулагчаар томилогдсон юм.

Олонхи мэргэжилтнүүд Ливерпулийн тааруу амжилтыг сэтгэлзүй шалдаа буусантай холбон тайлбарлаж байлаа. Энэ жилдээ Аваргуудын лигийн эрх авах боломжтой сайн бүрэлдэхүүн байсан ч байнгын хожигдол, гутралаас болж тэмцэх, өрсөлдөх урам зоригоо “Улаанууд” алдаад байсан. Харин Кенни Дэлглиш багт дутагдаад байсан тэр зүйлийг эргүүлэн авчирсан юм. Ямартай ч өдгөө Ливерпуль хүснэгтийн 6-р байранд Европын эрхтэй явж байна. Аваргуудын лигийн бүсээс найман оноо алдаж байгаа ч улирал дуусах болоогүй учраас үүнийг нөхөх бодит боломж бий.

Харин үүнийг хийхэд өвлийн цонхоор “Анфиелд”-д ирсэн  Луйс Суарес, Энди Кэрролын хүч хөдөлмөр, гоолууд зайлшгүй хэрэгтэй байна. Тэр тусмаа Фернандо Торрес гэсэн  том “брэнд” Челси рүү явчихсан болохоор эдгээр залууст найдахаас өөр зам “Улаанууд”-д алга. Рой Хожсоны түрүү зун авчирсан тоглогчид  бараг бүгд “flop” болсон учраас шинэ Ливерпулийн сэргэлтийн эхлэлийг тэд л тавих ёстой.

1. Луйс Суарес (А)

Хаанаас : Аякс

Хэдээр : 23 сая фунт

Тоглолт/гоол : 5/2

Шинэ эздийн хийсэн анхны наймаа урам хугалсангүй. Суаресийн наймааг мөнгөний гарз, дэмий үйлдэл гэж мэдэмхийрч байсан хүмүүс Юнайтедийн эсрэг үзүүлсэн гайхалтай тоглолтынх нь дараа амаа барьсан нь лавтай. Хувийн ур чадвар өндөртэй энэ залуу зөвхөн гоол хийгээд зогсохгүй бөмбөгний төлөө идэвхитэй тэмцэж Жеррардын мөрөн дээр ирдэг их “ачааг” бага ч гэсэн хөнгөлж өгч байгаа.

Сандерлэндийн эсрэг тун эвгүй байрлалаас хийсэн гоол нь ч Копуудын итгэлийг өөртөө татахад чухал нөлөө үзүүлсэн. Одоо  урд шугаманд түүнтэй “харцаараа” ойлголцдог нэмэлт довтлогч байхад л Суаресийн гоолууд хөврөөд эхлэх байх. Ирэх зуны цонхоор Ливерпулийн удирдлага ч үүнийг анхааралдаа авах байх. Таван тоглолтод хоёр гоолтой байгаа Уругвай залуу Ливерпулийн өмнөх замыг гэрэлтүүлж байна.

2. Рауль Мейрелеш (А-)

Хаанаас : Порту

Хэдээр : 10.7 сая фунт

Тоглолт/гоол : 34/5

Магадгүй Рой Хожсоны Ливерпульд өгсөн ганц гэгээлэг зүйл  нь  Рауль  байх. Улирлын эхэнд Хожсон түүнийг тохирохгүй байрлалд тоглуулж байсан болохоор өөрийгөө тийм ч сайн харуулж чадаагүй байх. Угаасаа анх авахдаа  Хавьер Машераногийн орон зайг нөхөх зорилготой байсан хэрнээ Хожсон түүнийг баруун жигүүрт тоглуулснаараа том алдаа хийсэн.

Шигшээ багтаа ч төвийн байрлалд тоглодог Мейрелеш “цэцэглэх” мөч гэхдээ ирэх учиртай байжээ. Тодруулбал “гайхал” Хожсоныг явсны дараа л жинхэнэ Раулийг Ливерпулийн фенүүд харсан гэхэд болно. Эвертоны эсрэг дебут гоолоо хийхэд нь түүнд баяр хүргэж байсан ч энэ бүхэн дөнгөж эхлэл гэдгийг олон хүн гадарлаагүй байх. Португал залуугийн гоолын цуврал Сток сити, Челси, Уиганы эсрэг үргэлжилсэн. Цаашдаа ч түүний гоолууд орсоор байна гэдэгт итгэж байна. Харин түүнтэй зөрөөд Барса руу явсан Хавьер Машерано ингэхэд “амьд” уу ?

3. Энди Кэррол (С)

Хаанаас : Ньюкэсл

Хэдээр : 35 сая фунт

Тоглолт/гоол : 4/0

Ливерпулийн спорт эрхэлсэн захирал Дамьен Комоллигийн хийсэн “эрсдэлтэй”  наймаа. Их Британий түүхэн дэх хамгийн үнэтэй тоглогч шинэ багтаа дебутээ хийх гэж сар гаран хүлээсэн. Одоогоор дөрвөн тоглолтод оролцоод байгаа ч Кэрролын ид шидийг Ливерпульчууд харж амжаагүй л байна. Жинхэнэ довтлогч хүнд байх бие бялдартай энэ залуугийн бусдаас ялгарах давуу тал дэндүү их.

Английн шигшээн ирээдүй учраас шүүгч нар түүнд  арай өөрөөр  хандана байх. Мөн хүчний тоглолт сайтай толгойгоороо маш сайн тоглодог учраас жигүүрээс ирсэн дамжуулалтуудыг барагтай бол алдахгүй. Ганц асуудал нь жигүүрээс дажгүй дамжуулалт өгчих тоглогч л Ливерпульд дутагдаж байна. Кэрролд саад болж мэдэх зүйл бол дарамт.

Хөлбөмбөгийн бүх цаг үеийн түүхэнд наймдугаарт бичигдэх өндөр үнээр ирж, хэвлэлийн нүүрэнд байнга 35  сая гэсэн үгстэй хамт “заларч” нь залуу довтлогчид мэдээж дарамттай. Хамгийн дуулиантай “азгүй” тоглогч болчихвий гэсэн айдас Эндигийн толгойд эргэлдэж л байгаа байх. Хүлээгээд харж л байхаас.

4. Кристиан Поульсен (D)

Хаанаас : Ювентус

Хэдээр : 4.5 сая фунт

Тоглолт/гоол : 21/0

Жорж Жилетт, Том Хикс нарын “том” тоглогч авчрах гэсэн оролдлого  Поульсенээр дуусгавар болсон. Европын клубуудуд олон жил тоглож туршлага хуримтлуулсан түүнийг Ливерпулийн азгүйтлийг төгсгөл болгох тоглогчдын нэгээр нэрлэж байлаа. Гэвч бүтэлгүйтсэн. Бүр түүний тухай ийм онигоо хүртэл гарсан байсан.

Хаалгачын эсрэг  ганцаараа тулсан үед юу хийх вэ ?

Поульсен : Аль болох хурдан өөрийнхөө хаалгач руу бөмбөгөө дамжуулна”

Харин Дэлглишийн эрин эхэлснээс хойш  Поульсений тоглолт бага багаар сайжирсаар байна. Кенни ч түүний Блэкпуль, Вулверхэмптоны эсрэг үзүүлсэн тоглолтыг магтаж байсан. Ирэх зуны арилжааны цонхоор хамгийн түрүүнд  “Анфиелд”-ийг орхиж мэдэх тоглогч.

5. Жо Коул (E)

Хаанаас : Челси

Хэдээр : Үнэгүй

Тоглолт/гоол : 26/2

Кэрролын тоглолтыг өндөр үнэтэй  нь холбон шүүмжилж болох бол Жо Коулыг шүүмжлэхгүй байсан ч болох мэт. Английн шигшээ багт шинэ уур амьсгалыг авчирсан энэ тоглогчын карьерийг бэртэл гэмтэл чамгүй  сүйрүүлсэн. Гэхлээ бэртэлгүй үедээ ч шинэ багийнхантайгаа сайн ойлголцож чадахгүй байгаа. Ливерпулийн өмсгөлтэй хийсэн лигийн дебут тоглолтдоо  улаан хуудас хүртээд ер нь ч барзгар эхэлсэндээ “Анфиелд” дэх карьераа. Эргээд харахад долоо хоногийн 90,000 фунтыг Жогийн цалинд дэмий зарж байх шиг байна.

6. Милан Йованович (E)

Хаанаас : Стандарт лиг

Хэдээр :  Үнэгүй

Тоглолт/гоол : 18/2

Рафа Бенитезийн явахаасаа өмнө хийсэн  наймаа.  Харамсалтай нь Рой Хожсоны ч тэр , Кенни Дэлглишийн ч тэр  төлөвлөгөөнд Йованович байгаагүй. Серби залуугаас Ливерпуль хэзээ ч их зүйл хүлээгээгүй гэхэд болно. Гэхдээ Өмнөд Африкийн ДАШТ-д оролцсон, “Стандарт” лигт байхдаа мэргэн бууч байсныг бодох юм бол бас шүүмжлэхгүй ч байж болохгүй мэт. Угаасаа хичээгээд ч чадахгүй байгаа юм чинь юу ч гэхэвдээ.

7. Пол Кончески (F)

Хаанаас : Фулхэм

Хэдээр : 3 сая фунт

Тоглолт/гоол : 18/0

Хожсоны хийсэн хамгийн муу наймаа. Экс-Фулхэмийн зүүн ард Ливерпуль тун өгөөмөр загнаж дөрвөн жилийн гэрээ санал болгосныг яана. Харин өөрт нь өгсөн  итгэлийг  Кончески хугалж Ливерпульд үнэндээ юугаар ч тус болж чадаагүй. Өвлийн цонхоор доод лигийн Ноттингэм Форест руу зээлсэн нь ч зөв болсон  юм.

Дүгнэлт : (D)

Түрүү зуны арилжаа наймааны цонхоор авсан есөн тоглогчдоос Рауль Мейрелеш  л гайгүй тоглож байна. Бусад нь үнэндээ хэрэг алга. NESV-н эзэн Жон Хенригийн томилсон Дамьен Комолли ерөнхийдөө Арсеналын арга барилыг барьж ажиллаж байгаа.

Өөрөөр хэлбэл ирээдүйтэй залуу тоглогчдыг хямд үнээр авчирч, бүрэлдэхүүнээ хүчирхэгжүүлэх. Гэхдээ Комолли хоёр л наймаанд гар бие оролцсон бөгөөд тэдгээр нь нилээд эртнээс Ливерпулийн “радар”-т орчихсон байсан тоглогчид.

Өвлийн цонхоор хийсэн хоёр  том наймаа харин дажгүй байгаа. Луйс Суарес аргаа олчихсон бол Энди Кэррол арай л амжаагүй байгаа. Гэхдээ удахгүй байх. Уг нь өвлийн цонхоор сайн дамжуулалт өгдөг жигүүрийн хагас хамгаалагч руу “чичрэх” хэрэгтэй байсан юм. Жишээлбэл Яанг ч юм уу.  Мэдээж Торресийн шилжилт гэнэтийн зүйл болсон. Үүнээс багийн төлөвлөгөө багагүй өөрчлөгдсөн байх. Энэ улиралдаа  Ливерпуль аваргуудын лигийн эрхээ “зулгааж” чадвал зунаас арилжаа наймаанд илүү ухаалаг ажиллах хэрэгтэй байх.

 

 

 

 

 

 

"Ливерпуль"-н солилцоо наймаанд үнэлгээ өгөх нь, 9.2 out of 10 based on 25 ratings