Сити өнгөрсөн зуны арилжаа наймаанд 110 сая фунт заржээ. Арай л аймар байна уу. Мөнгө нь илүүдсэн Ситигийн Араб эзэн Шэйх Мансурын “ачаар” хөлбөмбөгийн зах дээр үнийн хөөрөгдөл үүсэж багууд тэдний ямар хөдөлгөөн хийхийг харж суусаар есөн сар гаргасан.

Хэрвээ мөнгөөр амжилт, ялалтыг худалдаж авдагсан бол өдгөө Сити премьер лигийн хүснэгтийг тасархай тэргүүлж, Европын лигийн хасагдах шатанд үлдчихсан байх ёстойсон. Гэхдээ үгүй. Хөлбөмбөгт ингэж явдаггүй юм.

Хичнээн олон супер одод авчирлаа гээд тэд нь хоорондоо ойлголцож чадахгүй, нэг нэгэндээ туслахгүй, багийн тоглолт, сайн тактик байхгүй бол хэдэн хэдэн зуун сая фунт цацаад ч тогтвортой амжилт үзүүлж чадахгүй. Өнөөгийн Ситигээс ч үүнийг харж болохоор байна. Украйны лигтээ Шахтёроос 12 оноо алдаж байгаа Киевийн Динамог ч барж чадалгүй хасагдчихлаа.

Улирлын эхэнд аваргын төлөө өрсөлдөх хэмжээний баг бүрдлээ хэмээн сүржин зарлаж байсан ч одоо Аваргуудын лигийн эрх үү, үгүй юу гэдэг дээрээ тулсан байна. Гэхдээ шинээр Ситигийн эгнээнд шилжсэн залуус муугүй тоглож байгааг дурьдах хэрэгтэй. Доод тал нь 10 сая фунтээр  үнэлэгдсэн тоглогчид болохоор амжилт хүлээхээс ч яахав. Ингээд “Цэнхэр сар”-нууд арилжаа наймаанд хэр оновчтой ажилласныг дүгнэцгээе.

1. Давид Силва (B)

Хаанаас : Валенси

Хэдээр : 24 сая фунт

Тоглолт/гоол : 42/5

Силватай бараг харцаараа ойлголцдог байсан Давид Вильяг уг нь хамт авчирсан бол Ситигийн амжилт одоогийнхоос  тодорхой хэмжээгээр  илүү байсан байж ч мэдэш. Испаний “тики така” стилийн жижиг биетэй Силваг Английн хөлбөмбөгт дасаж чадах эсэхэд эргэлзэх хүн цөөнгүй байсан. Гэхдээ эхний тоглолтоосоо л ДАШТ-ий аварга хөлбөмбөгч маань дээрх эргэлзээг сарниулж Ситигийн фенүүдэд таалагдсан. Бүр яваандаа Силвагийн тоглолт багийнхаа мотор болох явц руу орж байна. Яя Туретэй хамт Карлос Тевесийн тун сайн дэмжиж тоглож байгаа. Бага гоолтой байгаа нь тийм ч шүүмжлэхээр зүйл биш. Испанид байхдаа ч Силвагийн гоол их байгаагүй. Өөрийн амбицаас илүү багийн амжилтыг илүүд үздэг учраас цөөхөн гоолтой байдаг ч юм билүү.

2. Яя Туре (B)

Хаанаас : Барселона

Хэдээр : 24 сая фунт

Тоглолт/гоол : 40/6

“Цол дагаж бяр нэмэгдэнэ”  гэдэг шиг цалингаа дагаж тоглолт нь сайжирсан залуу. Ситигийн түүнд амласан долоо хоногийн 220,000 фунт бол  Премьер лигт хэр баргийн тоглогч аваад байдаггүй цалин. Бөмбөгтэй удаан барьж,  ганган хууралт хийгээд байдаггүй ч талбайг нэвт шувт харж оновчтой дамжуулалт өгөх чадвараараа Манчинид үнэлэгдсэн.

Барсад хамгаалалт тал руу анхаардаг байсан Яя Ситид довтолгоонд анхаарах болсон. Шинэ үүргээ ч түргэн ухамсарлаж өдгөө лигт дөрвөн гоол хийчихээд байна. Барсад гурван жил тоглохдоо ийм тооны гоол оруулсан тоглогч шүү дээ. Ах Коло Туретэйгээ хамт   байгаа нь ч тоглолтод нь эерэгээр нөлөөлж буй.

3. Марио Балотелли (С)

Хаанаас : Интер

Хэдээр : 24 сая фунт

Тоглолт/гоол : 21/10

Роберто Манчини түүнийнг анх ирэхэд “Мариогийн тоглолтын стиль энд (Англид) яг тохирно. Нас залуу байгаа болохоор илүү сайжирна гэж итгэж байна. Ситигийн фенүүдэд түүний тоглолт таалагдана байх” хэмээж байв. Үнэндээ ч авьяастай, ирээдүйтэй “төрчихсөн” нэгэн.

Гэхдээ адайр ааш, сахилгагүй зан нь карьерийг нь булингартуулж байна.Динамо Киевийн эсрэг хийсэн тоглолтоос хөөгдсөн дуулиан нь намжиж амжаагүй байхад бас багиийнхаа залуус руу дартс шидэж зугаагаа гаргаад амжсан байх юм.

Одоо дэлхий даяар Балотеллигийн тухай “Нөгөө мангар хар уу” гэж л ярьж байгаа. Үнэхээр шүү. Бэлтгэлийн хувцсаа ч өмсөж чадахгүй байгаа бичлэг нь нетээр тараад бас л бөөн онигоо. Яана даа Супер Марио. Одоогоор 18 тоглолтод 10 гоолтой байна. Зан аашаа засчихвал ч сайхан “материал” бол байна л даа.

4. Александар Коларов (B-)

Хаанаас : Лацио

Хэдээр : 17 сая фунт

Тоглолт/гоол : 29/3

Улирлын нээлтийн тоглолтод Коларов гараанд багтсан ч харамсалтай нь шагайндаа бэртэл авч талбайг чөлөөлсөн билээ. Эхний хэдэн сарыг тэрээр бэртлээ эдгэрүүлж өнгөрүүлсэн ч эргэж ирснээсээ хойш Ситигийн зүүн талын хамгаалалтыг сайн авч яваа. Мөн хэрэгтэй үед довтолгоонд сайн оролцож хааяа хэрэгтэй гоол оруулчихдаг нь Манчинид их таалагдаж буй. Чөлөөт цохилт сайн хийдэг. Хоёр сарын эхээр Бирмингэмийн хаалгад дебут гоол чөлөөт цохилтоос хийгээд байгаа.

5. Эдин Жеко (С)

Хаанаас : Вольсбург

Хэдээр : 27 сая фунт

Тоглолт/гоол : 14/4

Бундеслигийн рекорд үнээр зарагдсан Босни довтлогч премьер лигт найман тоглолт хийгээд байгаа ч дебут гоолоо хүлээсээр л. Бусад цомын тэмцээнд дөрвөн гоол хийсэн ч тэдгээр нь ач холбогдлын хувьд бага байсан.

Жекод яг л Торресийн адил сэтгэлзүйн дарамт, бага зэргийн аз дутаж байгаа байх. Тэрнээс биш бундеслигт “бөмбөгдөгч” гэдгээ альхэдийнэ харуулчихсан шүү дээ. Одоо ч Германы лигт оруулсан 10 гоолыг давах тоглогч  Вольсбургт алга байна. Тийм болохоор энэ жил гоолын онгодтой байгаа Тевестэй харьцуулах нь утгагүй хэрэг. Хүлээгээд харах л хэрэгтэй.

6. Жеймс Милнер (С)

Хаанаас :  Астон Вилла

Хэдээр : 18 сая фунт

Тоглолт/гоол : 34/1

Манчини энэ залууг үнэлэхгүй байгаа нь харамсалтай. Одоо болтол Милнер Ситигийн гарааны бүрэлдэхүүнд баттай байр сууриа олж чадаагүй л байна. Эсвэл хагас хамгаалалтын бүх байрлалд тоглох чадвартай Милнерт багтаж шингэх зайгүй байна уу.   Де Йонг арын хамгаалах чиглэлд тоглож түүнтэй хамт Барри, Яя Туре сайн хоршиж байгаа болохоор эдгээр гурвалд Манчини илүүтэй итгэл хүлээлгэж байгаа. Мөн бэртэл гэмтэл ч бас Милнерийг бүрэн хүчээ гаргахад саад болж буй. Сүүлийн үед Итали дасгалжуулагч багийнхаа биеийн хүчний бэлтгэлд гомдоллох болсон. Энийг ашиглаад Милнер гараанд “хадагдаад” авах хэрэгтэй байгаа юм.

7. Жером Боатенг  (D)

Хаанаас :  Хамбург

Хэдээр : 10  сая фунт (Ойролцоогоор)

Тоглолт/гоол : 24/0

Ситигийн хүчний бүрэлдэхүүн гарааны эрхий төлөө нилээдгүй тэмцэл баг дотор өрнүүлсэн Энэ өрсөлдөөнд  Боатенг бусдаасаа хоцорч шоовдорлогдох болсон. 22 настай Германы залуугаас илүү Манчини зүүн талд Коларовыг илүүд үзэж буй. Төвийн хамгаалалтад ч гэсэн түүнд зай гарсангүй. Өнгөрсөн 12 сард Балотеллитэй  гар зөрүүлж багийн уур амьсгалд сөргөөр нөлөөлсөн.

Дүгнэлт : (B)

Манчинигийн наймааны зорилго багийн ерөнхий цөмийг сайжруулах байсан. Үүнийг нь ч Шэйх Мансур хангалттай бэлдэж өгөөд байгаа.  Зарим нэг тоглогдчыг эс тооцвол жинхэнэ Ситигийн тоглогч болсон залуус хэд хэд байгаа. Тэдгээр тоглогчид л ирээдүйн Манчетсерийн цэнхэрүүдийн сэргэн мандалтын үеийг авчрах учиртай. Манчинид багийн уур амьсгалыг сайжруулах зайлшгүй шаардлага байгаа.

Балотелли, Боатенг зэрэг түргэн ууртай залуусаас болж нэг тиймэрхүү нөхцөл бүрдээд байна. Бусдаар бол хүчтэй сайхан баг бүрджээ. Эндээс тэгээд дургүй зарим нь  явах нь яваад ирэх улирлаас илүү цэгцрээд ирэх биз.

 

 

 

 

 

 

 

"Ман Сити"-гийн солилцоо наймаанд үнэлгээ өгөх нь, 8.8 out of 10 based on 22 ratings