Сүүлийн хэдэн тойрогт фенүүдээ хангалттай олон гомдоосон Арсеналчууд дахиад л азгүйтлээ. Энэ удаа Венгерий баг сүүлийн найман тоглолтоос таван хожигдолтай байгаа Блекбернтэй гоолгүй 0 : 0-ээр тэнцжээ.

Бөмбөг эзэмшилтээр Буучид илүү байсан ч Пол Робинсоны чадварыг шалгасан жинхэнэ аюулт учруулсан цохилт төдийлөн хийж чадаагүй. Нийт хийсэн цохилтын тоогоор Арсенал өрсөлдөгчөөсөө бараг гурав дахин илүү байсан. Харин яг хаалга руу чиглүүлж таван удаа л цохижээ. 76 дахь минутад  Стивен Н’Зонзи талбайгаас хөөгдөж Блекберн    хүн дутуу үлдсэн ч Арсенал гоол хийлгүй байсаар цаг дуусгасан. Энэ улиралд Арсеналын эсрэг багууд нийт найман улаан хуудас аваад байна. Тэднээс өөр ийм олон хүн “хөөлгөсөн” баг байхгүй.

Лигийн цомын финалаас хойш талбайд гараагүй Сеск Фабрегас 58 дахь минутад Андрей Аршавинаар сэлгэж талбайд орж ирсэн. Мөн Никлас Бендтнер, Маруан Шамах нарыг 73, 78 дахь   минутад талбайд гаргаж довтолгоондоо хүч нэмсэн ч үр дүн муутай байлаа.

Гоолгүй тэнцээ Арсеналын хувьд хүсээд байхаар үр дүн биш боловч Блекберн сэтгэл хангалуун буцлаа. Кристофер Самба “Стивен Н’Зонзиг хөөгдснөөс хойш манайхан маш сайн хамгаалж оноо авлаа. Бид шийдэмгий байж чадсан учраас энэ үр дүнд хүрсэн. Ирэх тойрогт хожил авах урмыг их сэргээж өглөө” гэлээ.

Арсен Венгер “Ямар ч идэвхигүй, сулбагар байсныхаа горыг амслаа. Уг нь тоглолтын эхэнд хожил авах бүрэн итгэлтэй байсан ч сүүлчийн шүгэл дуугарсны дараа  үнэхээр урам хугарсан. Довтолгооны шугам ямар ч санаачлага байсангүй. Аваргын өрсөлдөөнөөс илүү багийн тааруу тоглолтод санаа зовж байна. Хожил авах итгэлтэй тоглох хэрэгтэй байгаа учраас үүн дээр анхаарч ажиллана” хэмээн ярилаа.