Жүдо бөхийн 2011 оны Азийн АШТ маргааш (IV.5) Арабын Нэгдсэн Эмират улсын нийслэл АбуДаби хотноо эхэлнэ. Олимпийн эрхийн төлөөх сорилгод том шалгуур болох энэ тэмцээнд манай улс эрэгтэй, эмэгтэйчүүдийн бүтэн багаа сойж буй билээ. Тивийн АШТ-ий өмнөх өдрүүдэд Бүсийн холбоод болон Азийн жүдо бөхийн холбооны чуулган явагдаж, удирдах бүрэлдэхүүнээ сонгов. Манай улсын харьяалагддаг Зүүн Азийн жүдо бөхийн холбооны хурал дөрөвдүгээр сарын 2-нд болоход МЖБХ-ны генсек М.Бөхбат тус холбооны ерөнхий нарийн бичгийн даргаар томилогджээ. Монголд жүдо бөхийг хөгжих суурийг тавьсан гавьяатнуудын нэг, гавьяат дасгалжуулагч Ч.Машбат агсны хүү тэрбээр ийнхүү бүс нутгийн хөгжлийн төлөө ажиллах үүрэгтэй боллоо. “Абу-Даби-2011” Азийн АШТ-д 24 орны 125 эрэгтэй, 87 эмэгтэй, нийт 212 жүдоч хүч үзэх ба тэмцээний эхний өдөр эмэгтэйчүүдийн 48 кг, 52 кг, 57 кг, 63 кг, эрэгтэйчүүдийн 60 кг, 66 кг, 73 кг-ын жингийнхэн өрсөлдөнө. Дөрөвдүгээр сарын 6-нд бусад жингийн барилдаан болж, маргааш нь Азийн АШТ-ий түүхэнд анх удаа багийн тэмцээн зохиогдох юм.