Stan Kroenke

Арсеналын хувьцааны 62.89 хувь Америк бизнесмен Стен Кронкегийн мэдэлд очсон нь   тодорхой болоод байна. Цаашдаа Кронке улам ахиж клубын хувьцааны үлдсэн хувийг худалдан авч Арсеналын эзэн болохоор санаархаж байгаа гэнэ. Түүний мэдэлд байдаг Kroenke Sports Enterprises (KSE) анх 2007 онд Их Буучдын хувьцааны 9.9 хувийг өөрсдийн болгож байсан. Түүнээс хойш бага багаар  эзэмших хувьцаагаа нэмэгдүүлж бусад хувьцаа эзэмшигчдийн хувийг салгах үйл ажиллагаа зохион байгуулах болсон. Он гарснаас хойш тэрээр  үнэт эдлэлийн худалдаачин Дэнни Фишерээс 16.1%, Энэтхэг бизнесмен бүсгүй Нина Брэйс-Смитээс 15.9 хувийг 731 сая фунтээр худалдан аваад байна.

Стен Кронке : “Арсенал шиг гайхалтай түүхтэй, сайн дасгалжуулагчтай багийг худалдаж авна гэдэг сэтгэл хөдлөм явдал. Энэ багийн аугаа түүхийг үргэлжлүүлж шинэ амжилтанд хүргэх нь бидний зорилго. Брэйс-Смит ч энэ зорилгыг маань дэмжиж хувьцаагаа худалдсанд баярлаж байгаагаа илэрхийлье. Мөн Петер Хилл-Вүүд клубын эрхлэгчийн албан тушаалдаа үлдэх болсонд ч сэтгэл хангалуун байна”

Их Британий хууль ёсоор ямар нэгэн байгууллагын хувьцаа эзэмшигчийн хувь  нь  29.99-өөс давсан тохиолдолд  үлдсэн хувьцааг эзэмшигчдэд санал тавьж худалдаж   авах боломжтой болдог. Энэ дагуу KSE хувьцаа тус бүрийг 11,750 фунтээр үнэлж худалдаж авах санал бусад эзэмшигчдэд хүргүүлж байгаа.

Одоо Кронкегийн дараагийн зорилго Оросын тэрбумтан Алишер  Усмановын хувийг эзэмшилдээ оруулах болж байна. Хэдийгээр Усманов клубын удирдах зөвлөлд байдаггүй ч гэсэн 27 хувийг эзэмшдэг юм. Өмнө нь Усманов клубыг өөрийн болгохоор мөн оролдож байлаа.

KSE-гийн эзэмшилд NBA-гийн Денвер Наггетс баг байдаг бөгөөд NHL-ээс Колорадо_Эвеланш, MLS-ээс Колорадо Рапидс багууд тэдэнд харьяалагддаг. (AST) буюу Арсеналын дэмжигчдын холбоо Кронкетэй сайн харилцаатай байдаг учраас энэ үйл ажиллагаанд таатай хандаж байгаа гэнэ.

Арсен Венгер харин энэ талаар “Би Кронкетэй удирдах зөвлөлийн уулзалтын үеэр цөөнгүй уулзаж ярилцаж байсан.  Тэр Арсеналын уламжлал, түүх соёлыг хүндэтгэдэг сайн бизнесмен. Хэрвээ клубын ирээдүй түүнээс шалтгаалах болвол надад татгалзах зүйл байхгүй” гэжээ.