Аваргуудын лигийн 9 удаагийн аварга “Эзэн хааны” Реал Мадрид клуб Тоттенхэмийг замаасаа холдуулж хагас шигшээд шалгарлаа.

Өнгөрсөн шөнө тэд Лондоны “Уайт Харт Лэйн” цэнгэлдэхэд зочлон тоглосон бөгөөд К.Роналдугийн нэг гоолоор хожил авч итгэл төгс дараагийн шатанд үлдэж байна. Мадридад явагдсан эхний тоглолтод 4 : 0-н харьцаатай ялалт байгуулсан учраас тэдний амжилтад эргэлзэх хүн цөөхөн байсан. Бүх зүйл ч ном ёсоор өрнөж Реалын супер одод өрсөлдөгчдөө гайхамшиг бүтээх боломж олгосонгүй.

Ийнхүү тэд 2002/2003 оны улирлаас хойш анх удаа Аваргуудын лигийн хагас шигшээд шалгарлаа. Тэр жилийн тэмцээнд Виценте Дель Боксегэрээ удирдуулсан Реал Мадрид шөвгийн дөрөвт Ювентусын өмнө өвдөг шороодож байлаа.

Тоттенхэм цуврал тоглолтын дүнгээр 5 : 0-н харьцаатай цэвэр тавиулсан бөгөөд Европын тэмцээний түүхэнд Английн багийн амссан хамгийн том хожигдол энэ боллоо. Гэхдээ тэдэнд харамсаад байх зүйл байхгүй. Анх удаа Европын тэргүүн багуудын тэмцээнд хөл тавьсан багийн хувьд шөвгийн найм гэдэг чамлахаар амжилт биш. Тэр тусмаа энэ хүртэлх замдаа Италийн хоёр “аварга загас”  Интер, АС Миланыг хожиж ирсэн болохоор олон гоолоох хасагдсан ч фенүүд нь багтаа баяр хүргэж байлаа. Нэг жил Европын тэмцээний амтыг мэдрүүлж  өмнө нь харж байгаагүй шилдэг багуудыг”Уайт Харт Лэйн”-д урьж авчирсанд тэд баяртай байгаа байх.

Тоглолтын өмнө Жосе Моуриньо торгууль хүлээхэд нэг шар хуудас дутуу байгаа таван тоглогчдоос заримыг нь амраана гэж мэдэгдэж байсан. Гэхдээ тэрээр шүгэл дуугарахын өмнө шийдвэрээ өөрчилж ганцхан Анхель Ди Марияг л сэлгээний сандалд үлдээж бусдыг нь гарааны бүрэлдэхүүнд багтаасан байлаа.

Реал Мадридын хамгийн их эмээж байсан тоглогч Гарет Бэйл эхний минутаас л аюул тарьж эхэллээ. Дөрөв дэх минутад Хави Алонсо түүнийг 16-гийн дотор унагасан ч шүүгч Риццоли тоглолтыг үргэлжлүүлэхээр дохисон.

Үүнээс дөрвөн минутын дараа Алонсо мөн л Лука Модричыг унагаасан хэдий ч  Риццоли торгуулийн цохилт заасангүй. Цэнгэлдэхэд цугласан фенүүд түүний шийдвэрийг эсэргүүцэж шүгэлдэж байлаа.

Харин Криштиану Роналду 20 дахь минутад өөрийгөө байгаа гэдгийг сануулж аюултай цохилт хийгээд амжлаа. Эсрэг талд нь Ленноны баруунаас ирсэн дамжуулалтыг чихэхэд багахан хэмжээний аз Павлюченкод дутсан. Орос довтлогчыг Рауль Альбиоль удалгүй өөрийнхөө талбайд унагаасан ч мөн л шүүгч торгуулийн цэгийг заалгүй Тоттенхэмийн фенүүдийн уурыг барлаа.

Тоглолтын эхний үед гаргасан шүүгчийн шийдвэрүүд ийнхүү Тоттенхэмд гайхамшиг бүтээх боломж олгосонгүй.  Харин дараагийн үе эхлээд таван минут өнгөрч байхад тэдний найдвар бүр мөсөн тасарлаа. К.Роналдугийн 25 орчим метрээс цохисон бөмбөгийг Гомеш барьж авах боломж бүрэн байсан ч гартаа ойлгон алдснаар бөмбөг хаалганд орсон. Ийнхүү дөрвөн гоол хийх даалгавартай байсан Тоттенмэмийн ажил улам хүндэрлээ.

Үүнээс хойш Моуриньо шилдэг тоглогчдоо дараагийн тоглолтод нөөж эхэллээ. Эхлээд Серхио Рамосыг Эстебан Гранерогоор, дараа нь Роналдуг Какагаар тус тус сэлгэсэн. Аваргуудын лигийн энэ улирлын дебут тоглолтоо Кака хийсэн бөгөөд Гомешийн чадварыг шалгасан хэд хэдэн цохилт хийгээд амжсан.

Харин Тоттенхэмээс Ленноныг сэлгэн Жермейн Дефо талбайд орж ирлээ. Гэхдээ тэд гоол хийх бус эсрэгээрээ алдах дөхсөн. Марселогийн хурдтай довтолгоо хаалгатай маш ойрхон өнгөрсөн. Үлдсэн минутад таван гоол хийх боломж Тоттенхэмд байсангүй. Ийнхүү тэд Аваргуудын лигийг орхиж Реал дараагийн шатанд үлдлээ. Жосе Моуринь дөрвөн өөр багтай аваргуудын лигийн хагас шигшээд үлдсэн анхны дасгалжуулагч боллоо.

4 сарын 13. Лондон. “Уайт Харт Лэйн”. цэнгэлдэх Ерөнхий шүүгч – Никола Риццоли (Итали ). ТОТТЕНХЭМ – РЕАЛ МАДРИД – 0:1 (0:0) Криштиану Роналду, 50 (0:1). Тоттенхэм Реал Мадрид Гомеш Икер Касильяс Ведран Чорлука Серхио Рамос (57) Вильям Галлас Рикарду Карвалью Майкл Доусон Рауль Альбиоль Бенуа Ассу-Экотто Альваро Арбелоа Арон Леннон (61) Хаби Алонсо (75) Том Хаддлстоун (71) Сами Хедира Лука Модрич (83) Криштиану Роналду (65) Гарет Бэйл Месут Ёзил Рафаэль Ван дер Варт Марсело Роман Павлюченко Эммануэль Адебайор Сэлгээ Джермейн Дефо, 61 Эстебан Гранеро, 57 Сандро, 71 Кака, 65 Нико Краньчар, 83 Карим Бензема, 75 Шар хуудас Рикарду Карвалью, 39 Эстебан Гранеро, 79