Ливерпулийн хаалгач Пепе Рейна багаасаа явах бодолгүй гэдгээ албан ёсоор зарлалаа. Испаний Cadena Cope радиод өгсөн ярилцлагадаа тэрээр “Надад энд сайхан байна. Үргэлж л тийм байсаар ирсэн.  Америк эздийн шинэ төлөвлөгөө амжилттай хэрэгжиж манай багийн сэргэлтийн үе удахгүй  ирнэ гэдэгт би  итгэж байгаа”

“Рафаел Бенитез намайг анх Ливерпульд авчирсан ч гэсэн энэ бол Кеннид дургүйлхээд байх шалтгаан биш. Яг одоо тэр Ливерпульд хэрэгтэй хүн гэдгээ нотолчихоод байна шүү дээ. Түүнтэй хамтарч ажиллаж байгаа дээ баяртай байдаг. Миний бодлоор бол ирэх нэг хоёр жилийн хугацаанд Копуудын хүч эргээд сэргэж аваргын төлөө  тулаанд дахин нэгдэх боломжтой”

Улирлын эхэнд багийнх нь амжилт тааруухан байсантай холбогдуулан Рейнаг явна гэсэн яриа газар авах болсон. Гэхдээ Кенни Дэлглиш ирснээр багийн амжилт тогтворжиж, тоглогчид эргээд өөрсдийн хүчиндээ итгэх болсон билээ. Хэдийгээр ирэх жилийн Аваргуудын лиг худлаа болсон ч гэсэн Рэйнагийн бодлыг энэ нь өөрчлөхгүй гэнэ. Испани хаалгач Копуудын шинэ эрин эхлэхийг хамтдаа харна хэмээж байна.

“Намайг бас МанЮ-тай холбоод байсан. Тийм зүйл байхгүй шүү. Де Хеа бид хоёроос гадна өөр олон нэр дэвшигчид тэдэнд байгаа. Манчестер луу явья гэж нэг ч удаа би хэлээгүй”

Рейна улирлын 34 тоглолтонд бүгдэд нь багийнхаа хаалгыг манасан. Мөн Аваргуудын лиг, цомын тэмцээнд ч банйга гараанд гарч байгаа. Ливерпульд ирэхээсээ өмнө тэрээр Вильярреал, Барселона багуудад тоглож байсан юм.