Монголын Үндэсний “Нийслэл лиг” тэмцээн анхныхаа тоглолтыг хийлээ.

Өнгөрсөн жилийн аварга Орхон аймгийн Эрдэнэт Уулын баяжуулах үйлдвэрийн “Хангарьд” клуб өнгөрсөн жилийн лигийн мөнгөн медальт Хан-Уул дүүргийн “Улаанбаатарын мазаалайнууд” багтай хүч үзлээ. Тоглолт эхнээсээ ширүүн тэмцэл дунд явагдлаа. Өнгөрсөн жилийн аваргуудын удаа дараагийн довтолгоон их хүлээлгэсэнгүй тоглолтын 16 дахь минутад 9 дугаартай спортын мастер М.Эрдэнэсайханы хаалганы өмнөх бужигнаан дундах цохилт амжилттай болж тэргүүлж эхэлсэн.

Гэвч тэдний давамгайлал 10 минут үргэлжлэх хувьтай байж. Тоглолтын 26 дахь минутад “Улаанбаатарын мазаалайнууд” багийн 2 дугаартай тамирчин Ө.Эрдэнэболорын торгуулийн гайхалтай цохилт тооны харьцааг 1:1 болгосон байна. Үндэсний шигшээ багт нэр нь дэвшээд байгаа “Хангарьд” клубын хаалгач Б.Сэр-Од үсрээд хүрсэнгүй, бөмбөг яг 90-ийн буланд орлоо

Тоглолтын 2 дугаар үед аль аль нь гоол оруулж чадсангүй. Үзэгчид Нигерийн легионер Paul Ebuka-аас гоолыг хүсэж байсан боловч энэ удаа гоолдож чадалгүй байсаар тоглолтоо дуусгалаа. Ийнхүү 15 дахь удаагийн “Нийслэл лиг” тэмцээн анхныхаа тэнцээг “өлгийдөн” авлаа. Тоглолтын үед нийт 2 шар карт олгогдсон байна.

Тоглолтын 1 дүгээр үе 50:50 харьцаатай үргэлжилсэн бол 2 дугаар үе 58:42 харьцаатай “Хангарьд” клубын давамгайлал дор явагдлаа.

Тэмцээний бас нэгэн сюрприз бол бүтэн “Нийслэл лиг” тэмцээний турш хамгийн бага карт авсан багт 1.0 сая төгрөг олгохоор болсон байлаа.

Мөн тасалбар авсан үзэгчдэд 10 бөмбөг бэлэглэсэн бөгөөд тоглолт болгоны завсарлагаанаар азтай үзэгчийг шалгаруулан үнэ бүхий зүйлсээр шагнахаар шийдвэрлсэн байна. Тоглолт өдөр бүрийн 18,00 цагаас эхлэн бөгөөд өнөөдөр анх удаагаа оролцож байгаа Чингэлтэй дүүргийн НЗДТГ-ын “FC Ulaanbaatar” баг Лигийн 1 удаагийн аварга “Хоромхон” клубтэй хүч үзнэ.

Нийслэл лигийн хуваарийг эндээс үзнэ үү