Эхний тоглолт : Шальке 0 : 2 МанЮ

Аваргуудын лигийн түүхэнд хасагдах шатны эхний тулаанд талбайдаа хоёр гоолын зөрүүтэй хожигдсон баг дараагийн шатанд үлдсэн түүх ховор. Харин Шальке өнөөдөр түүхийг шинээр бичихээр “Олд Траффорд”-д зочлох гэж байна. Долоо хоногийн өмнө явагдсан эхний тулаанд тэд 0 : 2-н харьцаатай “Фелтинс-Арена”-даа  ялагдал хүлээсэн. Хэрвээ Мануель Нойер байгаагүй бол тооны зөрүү үүнээс хэд дахин хол байх байсан. Нойер тэр үдэш хамгийн завгүй тоглогч байж бөмбөгөнд нийт 60 удаа хүрсэн байдаг. Гэтэл багийнх нь довтлогчид хүртэл түүнээс цөөн удаа бөмбөгөнд хүрсэн үзүүлэлт гарсан.

Гэхдээ тэдэнд бас сайн мэдээ байна. Эхний тоглолтыг өнжсөн Бенедикт Хеведес багийнхантайгаа бэлтэл хийж байгаа гэнэ. Мөн Клаас Ян Хунтелаар өвдөгний бэртлээсээ эргэж иржээ. Иймээс тэрээр Европын тэмцээний бүх цаг үеийн мэргэн бууч Раультай хамт довтолгоонд тоглох байх. Рауль “Олд Траффорд”-д тоглож байсан дурсамж бий.

Тэртээ 2000 онд Реал Мадрид – МанЮ-г талбайд нь 3 : 2-оор буулган авахад Рауль дубль хийж багаа хагас шигшээд үлдээж байлаа.   Ман Юнайтедийн хувьд хоёр фронтод тус сайн үзэж байгаа. Хэдийгээр өнгөрсөн амралтын өдөр Арсеналд дийлдсэн ч гэсэн лигийн хүснэгтийг 73 оноотой тэргүүлсээр байна. Энэ амралтын өдөр Челситэй хийх тоглолт их зүйлийг шийднэ.

Харин Аваргуудын лигийн тухайд гэвэл Юнайтед энэ жилийн тэмцээнд  “Олд Траффорд”-д ялагдаагүй гэсэн сүрдэм амжилттай. Магадгүй энэ амжилт тэднийг сүүлийн дөрвөн жилд гурав дахь удаагаа Аваргуудын лигийн финалд үлдэхэд тус болох юм.

Гэхдээ өрсөлдөгчөө хэтэрхий басах нь аюултай гэдгийг хөгшин чөтгөр “Фергусон” мэдэж байгаа. Тэрээр бага зэргийн бэртэлтэй байгаа Уэйн Рүүниг “Челси”-гийн эсрэг нөөж байгаа учраас Бербатов, Майкл Оуэн нар довтолгоонд гарах сураг байна. Пол Скоулз хагас хамгаалалтанд тоглох бол Фабио Арсеналтай хийсэн тоглолтод бэртсэн учраас талбайд гарахгүй. Сайн мэдээ гэвэл Даррен Флетчер хоёр сар гаран өвчтэй байсны эцэст эргэж ирж байгаа.

Баримт : Эхний тоглолтод оруулсан Гиггзийн гоол түүхэнд үлдсэн. Тэрээр хамгийн ахмад  настайдаа Аваргуудын лигт гоолдсон  тоглогч болжээ. (37)

Стат :  Шальке өмнө нь Английн багуудтай дөрвөн удаа тоглохдоо гурав хожигдож, нэг тэнцэж байжээ. 1958-59 оны Европын цомд Волвестэй 2 : 2-оор тэнцэж байсан юм.