“Атланта Хокс” плэй-оффын хоёрдугаар шатанд талбайдаа ялж чадалгүй багагүй хугацаа өнгөрсөн. 1996 онд “Орландо”-г буулгаж авснаас хойш энэ шатанд 9 дараалан талбайдаа ялагдаад байлаа.

Харин өнөө өглөө тэд хар цувралаа төгсгөж “Philips Arena”-д цугласан 19 мянган фенүүдийнхээ өмнө “Чикаго Буллз”-ыг 100-88-аар хожлоо. Хоёр багийн цувралын харьцаа ийнхүү 2 : 2 болон тэнцэж байгаа юм. Жое Жонсон 24 оноогоор багаа тэргүүлсэн ч олны анхаарал Жош Смит дээр төвлөрч байлаа. Тааруухан тоглолтоосоо болж шүүмжлэлийн бай болж байсан тэрээр энэ үдэш 23 оноо, 16 самбар, найман дамжуулалт өгч алдаагаа цайруулсан. Мөн түүнд Жефф Тиг маш тусалж 12 оноо, дөрвөн дамжуулалт өгсөн юм.

MVP Деррик Роуз 34 оноо авсан ч гэсэн   32 шидэлт  хийж эдгээр оноог авсан. Мөн 10 дамжуулалт, 4 самбар авсан байна. Цувралын гурав дахь тоглолтонд 44 оноо авсан тэрээр энэ удаа багаа хожилд хөтөлж чадсангүй.

“Хокс”-ын дасгалжуулагч Рик Санд гарааны бүрэлдэхүүндээ өөрчлөлт хийж Жэйсон Коллинсийг Эль Хорфорд, Смитийн дунд төвд тоглуулсан бол Марвин Уильямс сэлгээнд үлдсэн.  Коллинс тоглолтын эхэнд хэд хэдэн данк хийсэн ч талбайд 12 минутыг л өнгөрүүлсэн. Хорфорд харин цувралын хамгийн сайн тоглолтоо үзүүлж 11 шидэлтээс 9-г нь хийж 20 оноо авсан.

“Атланта” Деррик Роуз дээр гол анхаарлаа хандуулж сайн хамгаалж байсан ч хожлын бас нэг үндэс болсон. “Буллз”-аас Бузер 18 оноо, Луол Денг 13 оноо тус тус авлаа.

Цувралын 5 дахь тоглолт маргааш “United Center”-т явагдана.