Ла лигий 35-р тойргийн гурван тоглолт ням гаригийн үдэш явагдлаа. Гурав дахь дараалсан түрүүгээ хүртэхэд ойрхон байгаа Каталоны Барса энэ удаа дерби Эспаньолыг “Камп Ноу”-д угтаж авав. Өмнөх өдөр нь Реал Мадрид Севильяг 6-2-оор бут ниргэсэн болохоор хожил авахгүй бол онооны зөрүү ойртоно гэдгийг тэд мэдэж байсан.

Энэ даалгавараа ч Барса нэг их төвөггүй биелүүлж 2:0-ээр дербигээ сөхрүүллээ. Андрес Иньеста 29 дэх минутад Каменигийн хаалганд гоол оруулсан бол Пике 47 дахь минутад мөргөж тооны харьцааг холдуулжээ. Каталоны багийн  улирлын тав дахь толгойгоороо оруулсан гоол энэ боллоо. Харин Иньеста энэ жил найман гоолтой болж байгаа бөгөөд өмнөх хоёр улиралд оруулсан гоол нь нийлээд ч энэ тоонд хүрэхгүй.

Барса мөн сүүлд талбайдаа хийсэн 15 тоглолтод ялалт байгуулаад байгаа. 1974 оноос  хойш барса  талбайдаа ийм олон дараалж хожиж байгаагүй юм байна.  Үлдсэн гурван тойрогт Барсаг Леванте, Малага, Депортиво гэсэн багууд хүлээж байгаа.

5 сарын 8. Барселона. Стадион “Камп Ноу”. Шүүгч – Фернандес Борбалан (Альмерия).
БАРСЕЛОНА – ЭСПАНЬОЛ – 2:0 (1:0)
Иньеста, 29 (1:0). Пике, 47 (2:0).
Барселона	Эспаньол
Виктор Вальдес	Идрисс Камени
Даниэл Алвеш	Эрнесто Галан
Хавьер Маскерано	Хорди Амат
Херард Пике	Рауль Родригес
Андреу Фонтас, 72	Франсиско Чика
Хави, 90	Хоан Верду
Серхио Бускетс	Хави Лопес, 77
Андрес Иньеста	Хави Маркес
Педро, 84	Хосе Кальехон, 59
Давид Вилья	Иван Алонсо, 46
Лионель Месси	Пабло Освальдо
Сэлгээ :
Эрик Абидаль, 72	Луис Гарсия, 46
Ибрагим Афеллай, 84	Альваро Васкес, 59
Сейду Кейта, 90	Исаак, 77
Шар хуудас :
Педро, 62	Луис Гарсия, 62
	Идрисс Камени, 63
	Исаак, 85

Аваргуудын лигийн эрх олгодог 4-р байранд бичигдэж байгаа “Вильяреал” клуб Мальоркагийн “Оно Эстади”-д зочилсон ч гоолгүй тэнцлээ. Хэрвээ хожсон бол “Шар шумбагчид” 64 оноотой болж “Валенсия”-гаас хоёр онооны ард ирэх байлаа.