“Интер” Италийн цомын аваргын төлөө “Палермо“-той өрсөлдөхөөр боллоо. Хагас шигшээд тэд цомын тэмцээнд “зоолттой” таардаг Роматай тоглосон юм. Өнгөрсөн жилийн аваргууд эхний тоглолтыг Станковичийн нэг гоолоор тэргүүлээд байсан.

Харин өнгөрсөн шөнө явагдсан хариу тулаанд 1 : 1-ээр тэнцэж шигшээ тоглолтонд шалгарч байна. Самуель Это’о 58′ дахь минутад тооны харьцааг нээж энэ улирлын 34 дэх гоолоо орууллаа. 1997/98 онд Роналдо ч Интерт ийм олон гоол оруулж байгаагүй.

Марко Боррьело цаг дуусахаас өмнөхөн тэнцээний гоол оруулсан ч хэтэрхий оройтсон байлаа. Интерийн домог Хавьер Занетти мэргэжлийн хөлбөмбөгт 1000 дахь тоглолтоо хийж багтайгаа хамт баяраа тэмдэглэлээ. Интерийн өмсгөлтэй тэрээр 749 удаа талбайд гарчээ.

5 сарын 29-нд Интер – Палермогийн шигшээ тоглолт Ромагийн “Олимпико” цэнгэлдэхэд явагдана.  Интер сүүлийн долоон жилд зургаа дахь удаагаа Италийн цомын финалд үлдэж байна.