Дэлхийн шилдэг 20 даамчин Голландын Эммелорд хотноо энэ өдрүүдэд оюунаараа тулалдаж байна. Дэлхийн аварга шалгаруулах 100 буудалт даамын тэмцээнд эх орноо төлөөлж, Ази тивийн дөрвөн удаагийн аварга, их мастер Д.Эрдэнэбилэг оролцож буй.

Тэрбээр хоёр хожил, зургаан тэнцээтэйгээр тэмцээнийг хошуучлагчдын эгнээнд явж байгаа билээ. Тэрбээр одоогийн байдлаар тус тэмцээнийг тэргүүлж буй ОХУ-ын их мастер, дэлхийн 10 удаагийн аварга Алексей Чижовтой өнөөдөр тоглоно.

Энэ өрөгт манай тамирчин хараар тоглох бөгөөд аваргыг хожвол оноо тэнцэх юм. Дэлхийн даамын шилдгийн шилдэг аварга энэ сарын 28-нд тодорно.