Даллас Маверикс өнөөдөр гайхалтай ялалтыг байгуулж 3-1 ээр цувралыг тэргүүлж эхэллээ. Эрч хүчтэй Тандер тэднээс оноогоор тасарсан байсан хэдий ч тоглолтын сүүлчийн таван минутад оноог барьж, улмаар цаг сунган ялалтыг байгуулсан юм. Оклахома хэдийгээр залуу, галзуу, халуун, сайн баг ч тэдэнд өнөөдөр туршлага дутлаа гэж хэлж болохоор. Суперсоникс баг дараа жилээс супер болох ч юм билүү. Майкл Жордан гурав дараалж аваргалахынхаа өмнө Детройтод ингэж хожигдож л байсан гэсэн. Тиймээс залуучуудад их ирээдүй байна. Ямартай ч Далласаас их юм сурч байна.

Тоглолтыг Тандерсийн залуучууд тун сайхан эхэлж төгс гэмээр тоглож байсан. Гэсэн ч Далласынхан онооны зөрүүг 15-аас илүү гаргахгүй байлаа. Тоглолтын төгсгөл хүртэл энэ байдал хадгалагдаж сүүлчийн таван минутад тоог Даллас тэнцүүлсэн юм.

Дирк Новицки 40 оноо авч багаа тэргүүлсэн бол нэмэлт цаг дуусахаас 40 секундын өмнө Жейсон Кидд холын зайнаас маш тайван шидэж хийснээр ялалт авах боломжтой болсон. Мөн Кидд, Мэрион нар чухал үед хэрэгтэй хэрэгтэй хамгаалалтуудыг Вестбрүк, Дюрант нар дээр хийж байлаа. Дюрант нийт 9 удаа бөмбөгөө алджээ.

Өнөөдөр Тандерс хожигдсоноор плей-оффт анх удаагаа дараалж ялагдлаа. Түүнчлэн сүүлийн зургаан сарын хугацаанд анх удаагаа талбайдаа хоёр дараалж хожигдож байна.

Даллас баг сүүлийн 11 жилийн хугацаанд бүх улиралд 50-аас дээш ялсан ч нэг ч аварга аваагүй, ердөө ганц удаа л шигшээд хүрч байсан билээ.