Нийслэл лиг тэмцээн сонирхолтой тоглолтуудаар үргэлжлэн явагдсаар байна. 2011 оны 5 дугаар сарын 24 ба 25-ны өдрийн тоглолт үнэхээр гайхалтай хөлбөмбөгийн ур чадварыг харуулсан тоглолтоор өрнөлөө. Эрдэнэт хотноо явагдсан 24 дэх тоглолт нутгийн ард түмний баяр баяслаар өндөрлөх ёстой юм байж.

Тоглолтын 1 дүгээр үед талбайн эзэн “Хангарьд” багийн нигери легионер 15 дугаартай Паул Ебука болон FC Ulaanbaatar клубын хагас хамгаалагч 7 дугаартай Б.Бат-Эрдэнийн гоолуудаар 1:1-ийн харьцаатайгаар өндөрлөлөө.

Нигери тоглогч сүүлийн тоглолтод 2 гоол хийгээд байсан бөгөөд энэ нь тохиолдлын биш өөрийн ур чадвараар хийсэн гэдгээ илтгэн 2 дугаар үед гаргаж өөрийн энэ тоглолтын 2 дахь нийтдээ 4 дэх гоолоо орууллаа. Ийнхүү өнгөрсөн жилийн аваргууд бага ч гэсэн хасагдах аюулаас мултарсан үзүүлэлттэйгээр 1 дүгээр тойргоо үргэлжлүүлж байна.

25 дахь тоглолт

Лигийн 6 удаагийн аварга “Эрчим” өөрийн талбай дээр “Сэлэнгэпресс” багийг хүлээн авлаа. Тоглолт эхлээд удаагүй байтал манай хашир туршлагатай ахмад спортын мастер Энхбаярын хүү “Сэлэнгэпресс”-ийн Э.Чинбаатар 30 орчим метрийн зайнаас солгой хөлийн гайхалтай цохилтоор тэргүүллийг авчирлаа. Хөлбөмбөг үе дамжиж байгааг хүүгийн цохилт харуулсан болов уу. Дархан аваргууд ч хожигдох эрхгүй гэдгээ сайтар мэдэрч байсан учраас довтолгоогоо ширүүсгэлээ. Тун удалгүй 3 ч аюултай оролдлогыг шигшээ багийн тамирчин 6 дугаартай Б.Анар хийсний үр дүн гарч тооны харьцааг тэнцүүллээ.

Тоглолтын 2 дугаар үе “Сэлэнгэпресс”-ийн 9 дугаартай Д.Энхтайвны тоглолтыг харуулсан үйл явдал боллоо. Цагтаа Үндэсний шигшээ багт тоглож байсан тэрээр эхний гоолоо 51 дэх минутад хийлээ. Эрчим ч хариуг нь дор нь барьж шигшээ багийн тоглогч 8 дугаартай Ц.Энхжаргал 2:2-ийн харьцаатай болголоо.

Шүүгч нэмэлт 4 минутыг өргөлөө. Тэнцээгээр дууслаа хэмээн бодож байтал “Эрчим”-ийн Анар бөмбөгөө алдах нь тэр. Энэхүү боломжийг Д.Энхтайван алдсангүй 30 орчим метрийн зайнаас лигийн тэмцээний хамгийн гоёмсог гоолуудын нэгийг хийснээр ялалтыг өөрт авч чадлаа. 1 дүгээр тойргийн дараа лигийн тэмцээний хамгийн шилдэг гоолыг UBS телевизээс шалгаруулах бөгөөд энэ гоол түрүүлсэн байхыг үгүйсгэхийн аргагүй.

“Хоромхон” vs “Хүлэгүүд”.

Ширүүн өрсөлдөөнтэй 2011 оны “Нийслэл лиг”-ийн тэмцээн үргэлжилж байна. 26-ны өдрийн 18,00 цагаас лигийг тэргүүлэгчдийн дунд өрсөлдөөн өрнөнө. Аль хожсон баг нь 1 дүгээр тойргийг өнгөлөх ажээ.

Та энэхүү тоглолтыг заавал ирж үзээрэй.  Монголын хөлбөмбөгчдийн гайхалтай тоглолт таныг хүлээж байна.