Бямба гаригийн үдэш “Уэмбли” цэнгэлдэх рүү дэлхий нийт анхаарлаа хандуулах болно. Аваргуудын лигийн финалд үлдсэн Манчестер Юнайтед – Барселона багуудын тулаан түүхт энэ цэнгэлдэхэд явагдах билээ. Өмнө Европын топ багуудын тулааныг “Уэмбли” таван удаа угтан авч байсан. Харин Аваргуудын лиг хэмээн нэрлэгддэг болсноос хойш анх удаа зохион байгуулах гэж байна. Ингээд та бүхэнд өмнөх финалын тоглолтуудын талаар сонирхуулья.

1963.5.22 - АС Милан 2 : 1 Бенфика

Бразил довтлогч Жозе Алтафинигийн оруулсан хоёр гоолын ачаар АС Милан анхны Европын цомоо хүртэж байлаа. Үүнээс хойш тэд 6 удаа цомыг өргөсөн гэдгийг та бүхэн мэдэх байх. Домогт Эйсебио Португалын багт нэр төрийн нэг гоолыг авчирсан.

Зодог тайлсныхаа дараа Алтафини алдартай хөлбөмбөгийн тайлбарлагч болсон бөгөөд ‘Golaccio’ хэмээх хэллэгийг олонд таниулсан нэгэн. 90′-ээд оны эхээр гарч эхэлсэн цуутай  ’Football Italia’ нэвтрүүлгийг энэ үг нээдэг байлаа.  Английн үзэгчид эхэндээ үүнийг нь ‘Goal Lazio’ гэж буруу ойлгодог байсан гэдэг.

1968. 5.29 – Ман Юнайтед 4 : 1 Бенфика

Юнайтед Английн багуудаас анх удаа “Уэмбли”-д Европын цомыг өргөж үзсэн. Үндсэн цаг 1 : 1-ээр тэнцээгээр өндөрлөсөн. Улмаар нэмэлт цагт Жорж Бест, Бриан Кидд, Бобби Чарльтон нар 6 минутын зайтай гоолдож багтаа энэ цомыг авчирч байлаа.

58 оны Мюнхений ослоос хойш Юнайтед эргэн хүчирэгжиж, дээд цэгтээ тулсныг энэ ялалт харуулсан. Дээрхи ослоос амьд үлдсэн Бобби Чарльтон тоглолтын гол баатар байлаа. Тэрээр эхний гоолыг багтаа авчирсан. Гэвч Бенфикагийн Граса тооны харьцааг тэнцүүлсэн юм.

Бобби Чарльтоны гоол

1971.7.2 – Аякс 2 : 0 Панатинайкос

Иохан Кройфоор удирдуулсан Аякс Грекийн аваргыг хоёр гоолын зөрүүтэй буулган авч байлаа. Гоолуудыг Дик Ван Дик, сэлгээгээр орж ирсэн Арье Хаан нар багтаа авчирч Аякс анхны Европын цомоо хүртсэн. Энэ бол Аяксын дараалсан гурван Европын цомын эхнийх байлаа.

Английн талбайд болж байгаа болохоор Волверхэмптон хотын Жэк Тэйлор шүүж байсан. Хожмоо Тэйлор 1974 оны Недерланд – Баруун Германы хооронд явагдсан  ДАШТ-ий финалыг шүүн явуулж байсан юм.

1978.5.10 – Ливерпуль 1 : 0 Клуб Брюгге

Өдгөө Ливерпулийг дасгалжуулагч буй Кенни Далглиш Бельгийн багийн хаалгачыг давуулан цохиж хожлын гоолыг багтаа авчирч байлаа.  ”Улаанууд” Европын цомыг хоёр дахь жилдээ дараалан хүртсэн нь энэ. Энэ бол Кеннигийн Ливерпульд ирсэн анхны улирал бөгөөд тэрээр өмнөх зун нь  440,000 фунтээр Селтикээс ирж байлаа.

"Хаан Кенни"

1992.5.20 – Барселона 1 : 0 Сампдория

Роналд Куманы сум мэт хүчтэй чөлөөт цохилт Барсад Европын клубуудын хамгийн нэр хүндтэй цомыг анх удаа авчирч байлаа. Энэ бол Европын цомын сүүлчийн улирал байсан бөгөөд дараа жилээс нь Аваргуудын лиг хэмээн нэрлэгдэх болсон юм. Бямба гаригт Барса “Уэмбли”-д 19 жилийн дараа дахин зочлох гэж байна.

Куман