Италийн цомын шигшээ тоглолт Рим хотын “Олимпико” цэнгэлдэхэд явагдаж  Интер Палермог 3 : 1-ээр буулган авч аваргаа хамгааллаа. Леонардод анхны цомоо авахад Самуель Это’огийн хоёр гоол тус болсон. Камерун довтлогч 26′, 76′ минутанд Шнайдерийн дамжуулалтаар дубль хийсэн.

Эсекьель  Муньос цаг дуусахаас 2 минутын өмнө маргаантай булангийн цохилтоос мөргөж тооны харьцааг 2 : 1 ойртуулсан. Харамсалтай нь Муньос цаг дуусахаас өмнө хоёр дахь шар хуудсаа авч талбайгаас хөөгдсөн юм. Ингээд Сицили арлын багийн найдварыг Милито тасалж 90+1 дэх минутад багийнхаа ялалтыг баталгаатай болгосон гоолыг хийсэн юм. Түүнд Пандев дамжуулалт өгчээ.

Это’о цомын тэмцээний мэргэн буучаар 5 гоолтой тодорч байна. Энэ ялалтын ачаар Интер ирэх найман сард АС Милантай “Супер цом”-н төлөө өрсөлдөхөөр боллоо. Интерийн хөрш АС Милан энэ улиралд удаан хүлээсэн лигийн аварга цолоо эргүүлэн авсан билээ.

Палермо анх удаагаа Италийн цомын шигшээд шалгарсан. Гэвч Интертэй хийсэн сүүлийн 5 тоглолтын адил ялалт байгуулж чадсангүй.  Интерийн хувьд 7 дахь Италийн цом юм. Сүүлийн 7 улиралд тэд 4 Италийн цом авч байна.